• Per prumèr viatge, Aran compdarà damb un Plan d’Accion en encastre dera salut mentau e es addicions que, desvolopat per Aran Salut, hè especiau incís enes accions de prevencion des addiccions e deth suicidi, e era promocion dera salut mentau perinatau e dera salut emocionau, a trauès d’accions dirigides ara poblacion damb major situacion de vulnerabilitat coma pòden èster joeni, hemnes en estapa perinatau, o damb situacion de violéncia masclista, persones damb ua situacion sociau e economica desfavorabla, enfància e gent grana

Eth govèrn deth Conselh Generau d’Aran impulse, a trauès d’Aran Salut, eth prumèr Plan d’Accion tara atencion dera salut mentau e es addicions ena Val d’Aran. Un plan que sorgís pr’amor des besonhs detectadi dempús dera pandèmia dera COVID-19 per çò que tanh ar estat de salut mentau, es addiccions e eth benèster emocionau dera ciutadania aranesa.

“Ua part considerabla d’aguest Plan d’accion se centre ena promocion dera salut mentau e era prevencion des afeccions en aguest àmbit”, explicaue era sindica d’Aran, Maria Vergés, en tot híger que: “es intervencions en aguesti encastres an coma objectiu redusir es risqui, aumentar era resiliéncia e crear entorns favorables entara salut mentau”.

Malerosament, era COVID-19 diboishèc un panorama d’aument fòrça significatiu deth malestar emocionau e fisic des persones damb increments considerables ena deteccion de patologies mentaus incipientes, e agreujamet des dejà diagnosticades, mesurades a trauès deth nombre de temptatives de suicidi e suicidis consumats, e en un aument deth consum addictiu de substàncies e d’ues autes addiccions.

“Es aspèctes deth Plan enes que mès incís se hè son es accions de prevencion des addiccions e deth suicidi, e era promocion dera salut mentau perinatal e dera salut emocionau” apuntaue era sindica d’Aran, que higie: “prebotjaram activitats dirigides ara poblacion damb major situacion de vulnerabilitat en relacion ara manca de salut mentau e es addiccions, coma persones joenes, hemnes en etapa perinatal, hemnes damb situacion de violéncia masclista, persones damb ua situacion sociau e economica fòrça desfavorable, enfància e gent grana”.

Atau madeish, aguest Plan d’accion tanben s’a enfocat ena atencion as persones que patissen trastorns mentaus e/o addiccions en tot desvolopar un modèl d’atencion tara salut comunitària de manèra qu’era assisténcia sigue mès accessibla e que permete ua recuperacion foncionau e sociau dera persona, satisfasenta e adaptada ara sua situacion individuau.

De començaments d’an ençà, er airau d’Aran Salut a iniciat eth desplegament progressiu dera naua cartèra de servicis en tot impulsar un seguit d’accions e activitats e entà amià’c a tèrme, s’an incorporat naui perfils professionaus ara equipa multidisciplinar de salut mentau, integrada per professionaus der airau sociau e sanitari. En aguest sens, era sindica d’Aran a manifestat que “era volontat deth govèrn d’Aran seguís estant era de consolidar eth nòste sistèma sanitari e sociau e arténher eth maxim de servicis possibles que melhoren era qualitat de vida dera ciutadania d’Aran. E, per çò que hè ara salut mentau, aguest ère un des rèptes a assolir”.