• Pr’amor der elevat increment de nins presents ena Val d’Aran, eth Conselh Generau a començat a plaçar params selectius entara captura d’aguesta vèspa

• Aguesta espècia ei includida laguens deth catalòg espanhòu d’espècies exotiques invasores e a efèctes dirèctes envers ara biodiversitat d’invertebrats autoctòns, especiaument, sus es abelhes dera mèu

Deuant er elevat increment en nombre de nins presents en Aran de vèspa velutina, eth departament de Miei Naturau deth Conselh Generau d’Aran a iniciat un plan entà combàter aguesta espècia invasora, en tot plaçar params selectius entara captura d’aguesta vèspa, d’acòrd damb eth protocòu d’actuacions e seguiment dera vèspa asiatica elaborat peth Departament d’Acció Climàtica, Alimentació i Agenda Rural dera Generalitat de Catalunya.

Damb aguest Plan se preten capturar es naues reines fondadores qu’an suberviscut ara ivernacion e son responsables dera creacion des naui nins dera pròplèu tardor. En totau, s’an installat 150 params, que se revisen periodicament en tot compdabilizar eth numerò de vèspes.

Era vèspa velutina nigrithorax ei ua espècia includida en catalòg espanhòu d’espècies exotiques invasores, que se detectèc per prumèr còp ena Val d’Aran en 2012. Dera sua deteccion ençà, eth numerò de nins presents en nòste territòri s’a mantengut baish, a excepcion deth darrèr an, a on eth nombre passèc de 10 nins detectadi en 2021 a 157 en 2022.

Aguest increment ère previsible, pr’amor dera grana capacitat d’adaptacion dera espècia (damb precedents en d’autes regions deth nòrd d’Espanha) e dera meteorologia mès doça viscuda enes darrèri iuèrns, que hè aumentar era capacitat de perviuença des vèspes pendent era sua ivernacion. Per aguest madeish motiu, es parçans que presenten ua major densitat de nin son aqueri que se trapen en còtes mès baishes e damb ues condicions meteorologiques mès suaus.

Era principau problematica que produsís aguest nau predador ei er efècte dirècte envers ara biodiversitat d’invertebrats autoctòns, especiaument, sus es abelhes dera mèu.

Ath delà, pòt crear tanben ua percepcion d’inseguretat deuant era preséncia pròplèu des vespèrs. En aguest sens, eth Conselh Generau establic damb Pompièrs-Emergéncies es critèris d’actuacion deuant era deteccion d’un nin actiu.

Se bèth ciutadan/a percep bèth un d’aguesti nins e vò informar as autoritats, ac pòt hèr a trauès deth corrèu electronic conselh@aran.org o telefonant ath 973 64 18 01.