• Eth conselhèr de Territòri, Paisatge e Miei Ambient s’amassèc ager damb es presidents des associacions ramadères araneses, entà tractar sus es diuèrsi ahèrs d’interès tath sector ramadèr deth territòri entà coordinar eth seguiment e supòrt deth Conselh Generau d’Aran en aguestes questions

Eth conselhèr de Territòri, Paisatge e Miei Ambient, Francés Bruna, s’amassèc ager damb es presidents des associacions ramadères de cabrum, ovin e equin dera Val d’Aran entà parlar sus totes aqueres questions relacionades damb es sòns airaus.

En aguesta amassada, se parlèc de veïcular es besonhs de toti es ramadèrs e ramadères dera Val d’Aran a trauès d’aguestes associacions e que siguen ua forma de coordinar-se e qu’eth Conselh Generau d’Aran recebe totes es demanes deth sector.

“Er objectiu deth govèrn d’Aran ei mantier ua relacion fluida damb eth sector ramadèr e seguir trabalhant entà dar-les supòrt atau coma dejà auem hèt a trauès d’actuacions coma ei eth cas dera creacion des ajudes ath bestiar non retornat o era modificacion deth decrèt de danhs a fin d’aumentar eth valor indemnizable des atacs e equiparar-lo ath dera rèsta de comunitats vesies”, afirmaue eth conselhèr Bruna, en tot híger que: “era Val d’Aran ei un des territòris a on mès supòrt se da ath sector ramadèr en toti es ambits en comparacion damb es territòris vesins e eth nòste compromís ei contunhar trabalhant entà qu’eth sector ramadèr dera Val d’Aran pogue auer es maximes garanties possibles entà amiar a tèrme eth sòn trabalh a despièch dera complèxa situacion que viuen”.