• Aran Salut e eth Consorci d’Atenció Primària de Salut Barcelona Esquerra an signat un convèni entara redefinicion deth projècte d’atencion primària en Aran, qu’a coma objectiu adaptar era atencion primària deth territòri as besonhs actuaus que, damb eth pas deth temps e especiaument dempús dera pandèmia, an evolucionat e s’an d’ajustar entà non demorar obsolets en aguest airau

Era sindica d’Aran, Maria Vergés, acompanhada pes principaus responsables d’Aran Salut e eth Servici Aranés de Benèster e Salut, a recebut aguest maitin ena sedença administrativa deth Conselh Generau d’Aran ath gerent deth Consorci d’Atenció Primària de Salut Barcelona Esquerra (CAPSBE), Jaume Benavent.

Aran Salut e eth CAPSBE an signat un convèni de collaboracion entara redefinicion deth projècte d’atencion primària en Aran, qu’a coma principau objectiu adaptar era atencion primària deth nòste territòri as besonhs actuaus que, ath long deth temps e especiaument dempús dera pandèmia, an evolucionat e s’an d’ajustar entà non demorar obsolets en aguest airau.

“Per miei d’aguest convèni, eth Consorci mos aufrís eth sòn assessorament entà desvolopar es accions qu’ath long d’aguesti mesi presentaram, ena linha d’impulsar era atencion primària en tot definir eth papèr des professionaus, de coma son integradi laguens deth sistèma transversau sanitari e sociau d’Aran Salut, e en tot balhar-les tanben naui estruments, sustot aguest assessorament extèrn per part d’ua entitat damb long recorrut e fòrça experiéncia en sector que mos pòt ajudar a melhorar fòrça era atencion as persones”, afirmaue era sindica d’Aran.

Eth Consorci d’Atenció Primària de Salut Barcelona Esquerra ei ua entitat publica constituida per Institut Catalan dera Salut e er Espitau Clinic de Barcelona damb mès de vint ans d’experiéncia en sector e que proporcionarà a Aran Salut un acompanhament en tot eth procès de redefinicion deth sòn projècte d’atencion primària.