-
Eth pròplèu deluns, 20 de març, aurà lòc era Jornada d’Innovacion e Economia organizada peth Conselh Generau d’Aran, eth HUB HèPic, eth Ministèri entara Transicion Ecologica e eth Rèpte Demografic e era Associacion d’Innovacion en Montanha, ena que se realizaran presentacions per part d’agents expèrts ena matèria, ua exposicion e mòstra de projèctes innovadors, ua ròda de networking e taules de trabalh a on s’amiarà a tèrme ua dinamizacion entà desvolopar e aplicar projèctes innovadors
-
Era jornada, qu’ei de franc e dubèrta entà totes aqueres persones que i volguen participar, supause tanben un espaci de trobada e escambi damb agents deth sector economic e dera innovacion
Eth Conselh Generau d’Aran, eth HUB HèPic, eth Ministèri entara Transicion Ecologica e eth Rèpte Demografic e era Associacion d’Innovacion en Montanha an organizat era prumèra Jornada d’Innovacion e Economia ena Val d’Aran, qu’aurà lòc eth pròplèu deluns, 20 de març, en Hotel Tuca (Carretèra de Betren 25).
Aguesta jornada acuelherà presentacions per part d’agents expèrts ena matèria, ua exposicion e mòstra de projèctes innovadors, ua ròda de networking e taules de trabalh a on s’amiarà a tèrme ua dinamizacion entà desvolopar e aplicar projèctes innovadors, qu’ajuden ara diversificacion economica e territoriau, segontes tematiques e airaus d’interès en endrets de montanha en airaus coma era tecnologia, es espòrts de montanha, era cultura, era atencion sociau, era energia, eth miei ambient o eth sector agroalimentari.
“Auem impulsat aguesta jornada entà dar a conéisher coma innovar, quini son es rèptes qu’an d’encarar es territòris de montanha coma eth nòste ena actualitat e quines responses podem balhar” afirme era sindica d’Aran, en tot híger que: “compdaram damb agents que, damb es sues idèes innovadores, s’an convertit en casi d’èxit e referents des sòns respectius sectors”.
Aguesta jornada, qu’ei de franc e dubèrta entà totes aqueres persones que i volguen participar, supause tanben un espaci de trobada e escambi damb agents deth sector economic e dera innovacion de d’auti territòris de montanha. Entà formar-ne part, sonque ei de besonh inscriuer-se en aguest formulari.