• Era creacion d’aguesta Taula respon ara volontat deth govèrn d’Aran d’establir un espaci de coordinacion e participacion entà, per un costat, establir un debat constructiu sus er ensenhament en Aran e, per un aute, impulsar accions qu’ajuden ath desvolopament e consolidacion dera Escòla Aranesa coma element vertebrador dera nòsta societat e coma motor deth procès de normalizacion lingüistica

Aguest maitin a auut lòc ena sedença deth Conselh Generau d’Aran era amassada de creacion dera Taula der Ensenhament dera Val d’Aran, qu’a compdat damb era preséncia dera sindica d’Aran, Maria Vergés, es direccions des escòles d’educacion primària, Institut d’Aran, CRP Val d’Aran, EAP Val d’Aran, ETEVA e Tecnics der Airau de Politica Lingüistica deth Conselh Generau d’Aran.

“Damb aguesta Taula pretenem daurir un canau bidireccionau de relacion entre era Escòla e tot eth sector educatiu damb era maxima institucion d’Aran, entà debàter sus era actualizacion deth modèl d’Escòla Aranesa que ven d’acomplir quaranta ans e des rèptes e besonhs qu’a aguest sector en Aran” manifestaue era Sindica, que higie que “era escòla ei un des pilars fonamentaus dera nòsta societat e volem impulsar accions que l’ajuden a desvolopar-se coma element d’integracion e de desvolopament sociau”.

Pendent aguesta prumèra amassada s’an definit es diuèrsi airaus sus es que se trabalharà en aguesta Taula, d’entre es que ne destaquen era normalizacion lingüistica der aranés, salut comunitària e accions institucionaus damb eth departament d’Educacion dera Generalitat.

En aguest sens, s’a convengut amiar a tèrme un plenari damb tot eth professorat d’Aran entà presentar aguesta Taula atau coma tota era informacion relacionada damb era situacion dera lengua e, ath temps, daurir un espaci d’intercambi d’impressions e prepauses damb es mèstres aranesi.

“Volem qu’aguesta relacion damb eth professorat servisque tanben entà méter en valor eth sòn trabalh ena societat e establir complicitats e sinèrgies damb toti eri e eres que permeten amiar a tèrme accions e projèctes transversaus qu’ajuden a auançar en matèria de lengua mès tanben de salut mentau o d’addiccions ena joenessa” declaraue era sindica d’Aran.

Vielha, 20 d’octobre de 2022