Vielha, 25 d’agost de 2017.- Eth Conselh Generau d’Aran, a trauès deth departament d’Agricultura, Ramaderia e Miei Naturau participe en Projècte “Habios”, ua iniciatiua que se preten cooperar damb toti es territòris qu’abaste era cadea pirenenca entà melhorar era eficiéncia ena conservacion dera avifauna e ena gestion d’abitats forestaus, laguens eth marc deth Programa Operatiu de Cooperacion Territoriau Interreg (Espanha, França, Andòrra) 2014-2020 POTECFA.

Es Pirenèus formen un des territòris europèus mès rics en biodiversitat. Coma zòna de nauta montanha, ei refugi d’espècies pròpries de climes mès heireds, ath delà d’albergar exemplars de flòra e fauna unica. En cas des audèths, es Pirenèus acuelhen es poblacions mès importantes de fòrça espècies per çò qu’era sua conservacion globau depen de com se gestionen es masses forestaus en es qu’abiten.

Eth projècte POCTEFA Habios, preten protegir e melhorar era qualitat des ecosistèmes de montanha pirenenca a trauès d’accions de conservacion d’espècies d’audèths bioindicadores (pic nere, pic mejan, pic dorsiblanc, paom, perditz chèrra, perditz blanca e Gauèca de Tengmalm).

Eth projècte Habios reunís a 17 sòcis d’ambdús vessants des Pirenèus, en Espanha, França e Andòrra. Entre eri se tròben administracions publiques coma son es govèrns de Navarra, Aragon e Euskadi, ministèris francesi de Miei ambient e d’Agricultura a trauès des sòns Burèus de Bòsqui e Fauna Silvestre, Govèrn d’Andòrra, eth Centre Tecnologic Forestau de Catalonha, associacions conservacionistes efederacions de caçaires, amassa damb eth Conselh Generau d’Aran.

Eth projècte a un còst totau de 95.143,28 € qu’era Union Europèa, a trauès deth Programa Interreg POCTEFA, ne finançarà 65%.

Foto