• Eth pròplèu dimars s’iniciarà ua campanha de remassada d’aliments enes principaus supermercats deth territòri entà dar cobertura ath servici deth banc d’aliments qu’a superat era demana qu’auie enquiath moment pr’amor dera situacion provocada peth coronavirus 

Pendent es darrères setmanes eth Conselh Generau d’Aran a amiat a tèrme diuèrsi repartiments d’aliments as familhes usatgères deth servici deth banc d’aliments atau coma a d’autes que, pr’amor des mesures de confinament, restriccions e paralizacion dera economia, an agut de besonh un supòrt en aguest ahèr. E, en aguest madeish sentit, s’a abasit tanben as familhes beneficiàries de bèques minjador pendent dues setmanes, enquia qu’an arribat es targetes monedèr qu’a abilitat eth Departament d’Ensenhament dera Generalitat.

Aguest servici deth banc d’aliments, que s’abastís normaument a trauès des enviaments periodics de Creu Roja, s’a vist fortament tensionat enquia trapar-se aguesta setmana damb ua reduccion fòrça importanta de productes.

Totun, cau díder qu’eth supermercat Mercadona de Vielha a donat ath banc d’aliments 900 bricks de lèit.

Pr’amor d’aguesta situacion, eth Conselh Generau d’Aran iniciarà eth pròplèu dimars ua campanha de remassada d’aliments setmanau ena que cada setmana s’especificaran es tipes d’aliments que son de besonh.

Atau donc, e en tot arregraïr era collaboracion des supermercats deth territòri, se plaçaràn punts de remassada enes supermercats Disbo, PlusFresc, Caprabo, Mercadona de Vielha e supermercat Boya de Les entara remassada des productes de besonh. Posteriorament, eth Conselh Generau d’Aran se n’encuedarà, a trauès der airau sociau, deth sòn triatge e repartiment.

Pendent es setmanes de confinament que portam d’ençà que se decretèc er estat d’alarma en tot eth país, son fòrça es establiments que s’an aufrit de forma totaument altruista a collaborar en tot donar aliments ath Conselh Generau entà hèr-les a arribar as qu’ac an de besonh, ua mòstra mès der esperit solidari d’Aran.