• Eth govèrn deth Conselh Generau a encomanat a un equip d’expèrts en aguest airau un estudi que determine es melhores qu’an de besonh aguestes vies

Era problematica de seguretat ena N-230 e es contunhs collapses ena C-28 an un impacte fòrça negatiu tara Val d’Aran e eth govèrn deth Conselh Generau d’Aran a coma ua des sues prioritats cercar solucions viables.

Ei pr’amor d’açò que s’a encomanat un estudi a un equip d’expèrts ena matèria qu’a de determinar quines mesures ei besonh préner e, segontes explique eth sindic d’Aran, Francés Boya, “instar as administracions responsables a hèr es melhores pertinents ena N-230 e era C-28”.

Era implementacion des resultats d’aguest estudi auran de besonh d’un cèrt temps e, pr’amor d’açò, eth sindic a anonciat que “responsables deth Servei Català de Trànsit, amassa damb eth Conselh Generau e es ajuntaments aranesi, estudiaran possibles melhores provisionaus ena C-28 que posquen aplicar-se enes pròplèu dimenjades entà sajar de redusir es tempsi d’accès ara estacion de Baqueira Beret”.

Aguestes accions son era prèvia ara redaccion d’un Plan de Mobilitat tà tota era Val d’Aran que determine es logiques que permeten desvolopar modèls de mobilitat mès sostenibles e eficaci, especiaument enes epòques de grana afluéncia toristica. Aguest Plan s’integrarà laguens deth Plan d’Urbanisme dera Val d’Aran, que cerque establir estratègies entà préner es mesures mès avientes a fin d’arténher floidesa en tot eth conjunt des infrastructures araneses.

Eth sindic d’Aran considère que “ja hè ans que s’aurie d’auer redactat un Plan de Mobilitat, e qu’aguesta manca de responsabilitat politica a dat coma resultat un sistèma d’infrastructures insufisent en contrast damb es equipaments toristics de prumèr nivèu qu’a artenhut era Val enes darrèri ans”.