• Eth govèrn d’Aran a iniciat es trabalhs tara naua licitacion deth servici de remassada de residus, pr’amor qu’er actuau contracte finalize en gèr de 2024. Dempús dera campanha d’informacion e conscienciacion sus era generacion de residus en Aran amiada a tèrme ara hè uns mesi, era maxima institucion aranesa daurís un procès participacion ciutadana entà definir eth nau modèl.
En tot preveir era finalizacion deth contracte actuau, eth Conselh Generau d’Aran trabalhe de hè un temps ençà en un nau modèl de servici de remassada de residus que melhore es deficits der actuau e s’adapte as besonhs reaus deth territòri.
Laguens d’aguesti trabalhs, eth Conselh Generau d’Aran inicièc hè uns mesi ua campanha d’informacion e conscienciacion enes hilats sociaus sus es donades reaus des residus que generam ena Val d’Aran e quin ei eth sòn recorrut. Ara, se daurís un procés de participacion entà qu’era ciutadania d’Aran pogue dar era sua opinion e hèr es sues prepauses sus coma vòlen que sigue eth nau servici de remassada de residus.
“Volem arténher un modèl de servici de remassada de residus foncionau, que melhore era imatge deth nòste territòri e, sustot, que mos ajude a melhorar es donades de generacion de residus, entà auançar a un futur mès verd e sostenible”, afirme eth conselhèr de Territòri, Paisatge e Gestion Ambientau, Oriol Sala, en tot híger que: “entath govèrn deth Conselh Generau d’Aran ei indispensable poder compdar damb era opinion dera nòsta ciutadania, per aguest motiu voi animar a toti es nòsti vesins e vesies a participar en aguest procés e díder era sua”.
Era remassada de residus ei ua competéncia municipau que siguec delegada ara maxima institucion aranesa per part des Ajuntaments aranesi ans endarrèr. En gèr de 2015 s’aprovèc era externalizacion per contracte de servici, un contracte que s’alongue enquia gèr de 2024.
En aguest sens, era sindica d’Aran, Maria Vergés apunte que: “eth modèl de servici actuau ei dimensionat segontes es donades de generacion de residus de hè lèu dètz ans, ues donades actuaument desfassades, era tipologia de residus d’alavetz ei fòrça aluenhada des besonhs qu’a dia d’aué auem entà complir damb es objectius mercadi pera UE e era Agéncia Catalana de Residus e, ath delà, eth contracte de 2015 non ten en compde es pics de poblacion pendent es sasons toristiques, çò qu’a comportat pendent ans acumulacions en dates de fòrça afloéncia”.
Entà arténher un sistèma de residus que s’adapte as besonhs deth nòste territòri e mos permete transicionar a ua gestion mès sostenibla, eth govèrn d’Aran vò compdar damb era participacion dera ciutadania aranesa. Totes es persones interessades en cercar possibles solucions as actuaus problematiques, pòden méter eth sòn gran de sable en tot ramplir era seguent enquèsta, dubèrta enquiath pròplèu 15 d’abriu:
Ligam tara enquèsta: https://bit.ly/3nqpBX8
Vielha, 27 de març de 2023