• Damb er objectiu de premanir era naua licitacion deth servici de transpòrt intèrn dera Val d’Aran, eth govèrn deth Conselh Generau d’Aran vò conéisher era opinion e prepauses des sòns usatgèrs e usatgères entà adaptar eth servici as besonhs actuaus dera ciutadania

Eth Conselh Generau d’Aran premanís era naua licitacion deth servici de transpòrt intèrn dera Val d’Aran, que gesserà a concors public a darrèrs deth mes de noveme. Per aguest motiu, s’inície aué un periòde de consulta entà conéisher era opinion dera ciutadania sus eth servici actuau e poder remassar tanben prepauses de milhora que seràn estudiades entà poder-les includir laguens dera naua licitacion.

“Entath govèrn deth Conselh Generau d’Aran ei fòrça important conéisher quina ei era opinion e es prepauses des ciutadans e ciutadanes qu’empleguen eth transpòrt public entà poder-les aufrir eth milhor servici possible, adaptat as sòns besonhs e as tempsi actuaus” afirmaue eth conselhèr d’Economia, Torisme e Promocion Economica, Juan Antonio Serrano, en tot animar “a toti es usatgèrs deth servici a participar en aguest procès participatiu e respóner eth formulari abans deth 30 d’octobre”.

Aguest formulari se pòt respóner a trauès d’aguest ligam, e tanben se plaçaràn, ath long d’aguesta setmana, pannèus informatius enes parades d’autobús dera Val d’Aran, damb un còdi QR que portarà ara enquèsta.