• Aguest protocòl a coma objectiu arténher espacis de léser segurs e liures de violéncies sexuaus, pr’amor qu’en aguesti contèxtes se produsissen un percentatge elevat d’agressions d’aguest tipe a hemnes

Eth Conselh Generau d’Aran a elaborat, damb era collaboracion dera Agéncia Catalana de Joventut e a trauès der Observatòri Noctámbul@s, un Protocòl d’Actuacion deuant es violéncies sexuaus en espacis de léser.

“Er objectiu d’aguest protocòl ei arténher espacis de léser segurs e liures de violéncies sexuaus, pr’amor qu’en aguesti contèxtes se produsissen un percentatge elevat d’agressions d’aguest tipe a hemnes”, explicaue era sindica d’Aran, Maria Vergés.

Pera sua part, era coordinadora territoriau de Joventut en Lhèida, Alt Pirineu e Aran, Maricel Segú Peralba, a mostrat era sua satisfaccion per auer podut desvolopar aguest projècte, atau coma peth trabalh conjunt e era implicacion dera administracion publica ena luta contra es violéncies masclistes e sexuaus.

Aguest protocòl, aprovat peth Plen deth Conselh Generau d’Aran eth passat 11 de junh, a estat elaborat damb era participacion e implicacion de professionaus, associacions, responsables des espacis de léser nocturn, joeni des comissions de hèstes e persones anonimes deth territòri, sensibilizades e concienciades damb era realitat tractada.

En aguest sens, era sindica d’Aran a volut arregraïr a totes es persones qu’an participat “era sua implicacion en aguest ahèr, pr’amor qu’ei un ahèr que mos afècte a totes e toti” e a recalcat “eth besonh de dar supòrt ad aguest tipe d’accions, qu’an coma objectiu eradicar era lacra que supause era violéncia de genre ena nòsta societat”.

Aguest Protocòl d’Actuacion deuant es violéncies sexuaus en espacis de léser, qu’incorpòre tanben ua uelhada LGBTI+, compde, per un costat, damb un plan d’accion que contemple era  adesion des municipis o entitats locaus,  qu’ei estructurat segontes es èishi estrategics dera prevencion, deteccion, atencion, recuperacion e reparacion e que establís un grop de seguiment deth Protocòl; e per un aute costat, compde tanben damb un plan de prevencion e sensibilizacion, que contemple ua sèrie d’actuacions comunicatives e pedagogiques adreçades a generar cambis en imaginari sociau que permeten auançar entara eradicacion dera violéncia masclista, atau coma un amàs d’accions formatives tà desvolopar damb anterioritat as dates des hèstes populares.