• Eth govèrn d’Aran a volut amiar a tèrme un reconeishement a Joan Canalias, que siguec ua persona de referéncia ena istòria recenta des Pompièrs d’Aran, pr’amor dera sua implicacion e compromís damb eth còs de Pompièrs e damb eth nòste territòri e era sua gent

Aguesta tarde a auut lòc er acte d’inauguracion dera Sala de Contròle de Pompièrs Emergéncies, que portarà eth nòm de Joan Canalias, atau e coma dejà indique era placa commemorativa qu’era familha, amassa damb era sindica d’Aran, Maria Vergés, a descobèrt aué.

“Deth Conselh Generau d’Aran ençà auíem era volontat de rendir aumenatge a Joan Canalias pr’amor dera implicacion e compromís qu’auec tostemp damb eth còs de Pompièrs d’Aran e damb eth nòste territòri e era sua gent”, explicaue era sindica d’Aran, en tot híger que: “ei per aguest motiu que, pògui mesi dempús deth sòn traspàs, arpovèrem en Conselh d’Administracion de Pompièrs Emergéncies qu’era Sala de Contròle, qu’en aqueri moments encara non ère bastida, portèsse eth sòn nòm coma reconeishement ara sua trajectòria”.

Joan Canalias siguec Director Generau de Pompièrs e Proteccion Civila e Conselhèr Delegat de Pompièrs Emergéncies S.L., atau coma cap deth parc de Vielha pendent ans, en tot desvolopar eth sòn trabalh damb leiautat ara Val d’Aran e era sua ciutadania.

Damb aguesta metuda en foncionament dera Sala de Contròle Joan Canalias, Pompièrs Emergéncies hè un pas endeuant ena planificacion e coordinacion dera responsa as emergéncies en Aran que permeterà arténher era integracion deth nau modèl de gestion integrau d’emergéncies.