• Damb aguest projècte de valorizacion toristica deth Refugi dera Honeria e er entorn dera Val de Toran, eth Conselh Generau d’Aran cerque potenciar aguesta zòna de forma responsable e sostenible, en tot diversificar tanben es punts d’interès deth nòste territòri

Era sindica d’Aran, Maria Vergés, e ar alcalde der Ajuntament de Canejan, Carlos Lastera, an presidit aguest maitin er acte oficiau d’inauguracion deth Refugi dera Honeria.

“Èm plan satisfèts de poder amiar a tèrme, ara fin, era inauguracion d’aguest equipament dempús des complicacions qu’auem viscut damb eth projècte, pr’amor dera crisi sanitària e es dificultats administratives” afirmaue era sindica d’Aran, en tot híger que: “ara, damb era òbra finalizada dam un pas en projècte de revalorizar tot er airau de Toran, en tot ajudar a potenciar eth desvolopament toristic dera zòna d’ua forma responsable e sostenible”.

Es actuacions amiades a tèrme pera maxima institucion aranesa an auut un valor de lèu 450.000 € e an compdat damb eth supòrt economic deth Departament d’Empresa e Coneishement dera Generalitat de Catalunya, eth programa Leader deth Departament d’Agricultura, Ramaderia, Pesca i Alimentació.

Aguest projècte aurà de perméter condicionar era Val de Toran e era sua accesibilitat, ath madeish temps que se presèrve er auviatge naturau e culturau que represente.