Vielha, 21 de hereuèr de 2019.- Era conselhèra de Salut e Benéster d’Aran, Anna Díaz, e es directors e directores des escòles e der IES dera Val d’Aran an signat eth renauiment des convènis entath finançament deth transpòrt des activitats extraescolars e de minjador escolar per part deth Conselh Generau d’Aran.

Era conselhèra Anna Díaz, expliquèc qu’enguan eth Govèrn d’Aran incremente en 15% era dotacion economica entà finançar eth transpòrt des activitats extraescolars des alumnes dera Val d’Aran. Er impòrt totau destinat ad aguesti convènis ei de 30.000 € qu’includís tanben 1.246,50 € entath finançament des viatges que realize eth CRP (Centre de Recorsi Pedagogics) ena Nauta Ribagorça e es Palhars a l’escasença des exposicions des TDR (Trabalhs d’investigacion) des alumnes de Bachillerat.

Es escòles Alejandro Casona e Sant Ròc arreceberàn 2.811,75 € cadua; Es ZER Val d’Aran arreceberàn 5.060,00 €; e er Institut d’Aran e era Escòla Garona 8.993,00 € cadun.

Er increment totau deth pressupòst destinat ad aguestes activitats ei de 20%.

D’autra banda, tanben s’an signat es renauiments entath cors 2018-2019 des convènis entath finançament parciau des servicis de minjadors escolars des escòles dera Val d’Aran, qu’an per objectiu igualar eth prètz des servicis de minjador escolar gestionat pes AMPA en totes es escòles d’Aran.

En aguest sens era conselhèra Anna Díaz a manifestat qu’era volontat deth Govèrn d’Aran ei afavorir era existéncia des petites escòles en toti es municipis dera Val d’Aran e mantier eth servici de minjador escolar e d’atencion as mainatges pendent er orari interlectiu de meddia en tot contribuir atau ara conciliacion laborau des familhes. Díaz a hijut qu’er objectiu d’aguesti convènis ei sajar d’igualar en totes es escòles dera Val d’Aran eth prètz deth servici deth minjador escolar que supòrten dirèctaments es familhes.