• En auer constatat a trauès des mieis de comunicacion era volontat der Ajuntament de Naut Aran de plaçar un gabarrit (“gàlib”) entà limitar er accès ath parcatge plaçat en Baqueira 1500 eth govèrn d’Aran a informat ath consistòri que, atau e coma reflectís un informe de Pompièrs Emergéncies que se les a hèt arribar, eth gabarrit (“gàlib”) qu’er Ajuntament a previst installar en parcatge a de compdar damb ua ua nautada e amplada minimes de 4’5 e 3’5 (ó 5 m) respectivaments entà assegurar eth pas de veïculs d’emergéncies

• Era titularitat d’aguest parcatge ei compartida per Ajuntament e eth Conselh Generau e quinsevolh accion, ocupacion e emplec que s’amie a tèrme a de compdar damb eth vist-e-platz d’andues administracions

• Era problematica que se pòt generar en aguest parcatge, atau e coma a senhalat eth govèrn d’Aran ena sua carta, a era sua arraïc ena manca d’abitatge assequible e, a despièch qu’eth govèrn d’Aran non a es competéncies de besonh entà resoler-la de manèra unilaterau, l’a començat a abordar damb eth Plan de Viuenda dera Val d’Aran, que se trabalhe damb es ajuntaments aranesi, excèpte damb eth de Naut Aran qu’a declinat participar-i. S’a tornat a encoratjar ar alcalde a prener-i part

Eth govèrn deth Conselh Generau d’Aran, dempús d’auer coneishut a trauès des mieis de comunicacion era volontat der Ajuntament de Naut Aran de plaçar un gabarrit (“gàlib”) entà limitar er accès ath parcatge plaçat en Baqueira 1500, a informat per miei d’ua missiva ath consistòri que, atau coma reflectís un informe elaborat per Pompièrs Emergéncies, aguest element a de compdar damb ua nautada e amplada minimes de 4’5 e 3’5 (ó 5 m) respectivaments tà poder assegurar eth pas de veïculs d’emergéncies.

Era titularitat d’aguest parcatge ei compartida per Ajuntament de Naut Aran e eth Conselh Generau d’Aran e quinsevolh accion, ocupacion e emplec que s’amie a tèrme a de compdar damb eth vist-e-platz d’andues administracions. D’un aute costat, atau coma asseguraue era sindica d’Aran, Maria Vergés: “per çò que hè ara ordenança que regule eth parcatge en municipi de Naut Aran, ei ua competéncia estrictaments municipau, mès ei obligacion deth Conselh Generau d’Aran assegurar es condicions de seguretat e proteccion civila autant en aguest endret coma en d’auti”.

Per çò que hè ara problematica que se pòt generar en aguest parcatge, era sindica d’Aran manifestaue que: “a era sua arraïc ena manca d’abitatge assequible que patís era Val d’Aran” e higie que: “tot e qu’eth Conselh Generau d’Aran non a es competéncies de besonh entà resoler-la de manèra unilaterau, l’auem començat a abordar damb eth Plan de Viuenda dera Val d’Aran, que trabalham damb es ajuntaments aranesi, excèpte damb eth de Naut Aran, qu’a declinat participar-i”. En aguest sens, deth Conselh Generau d’Aran ençà s’a tornat a insistir ath consistòri en participar-i e trabalhar de manèra conjunta entà trobar ua gessuda ad aguesta critica situacion.

Entà finalizar, ena missiva adreçada ar alcalde de Naut Aran, s’a encoratjat tanben ath consistòri a abilitar espacis damb es servicis de besonh que poguen acuélher eth parcatge d’autocaravanes e d’aute tipe de veïcles d’aguestes caracterisques, dera madeisha manèra qu’ac an hèt d’auti municipis.