• A compdar de deman se plaçaràn punts de remassada enes principaus supermercats deth territòri e es productes a remassar variaràn cada dus dies. Deman e deman passat se remassaràn borrassetes, potitos e cereaus tà papilhes.

Pr’amor der increment de demana qu’a patit pendent es darrèri dies eth servici deth banc d’aliments, a on s’a produsit ua reduccion fòrça important de productes damb motiu dera crisi deth COVID-19, eth govèrn deth Conselh Generau d’Aran inície deman, dimars 14 d’abriu, ua campanha de remassada d’aliments enes principaus supermercats d’Aran.

A compdar de deman se plaçaràn punts de remassada enes supermercats Disbo, PlusFresc, Caprabo, Mercadona de Vielha e supermercat Boya de Les entara remassada des productes de besonh. Cau híger qu’es productes basics a remassar anaràn cambiant cada dus dies entà arténher tot çò qu’es familhes mès vulnerables pendent aguesti crisi an de besonh.

Deman e deman passat se remassaràn borrassetes, potitos e cereaus tà papilhes, en tot garantir qu’es mès petits agen cobèrts es sòns besonhs.

Des deth govèrn deth Conselh Generau d’Aran se vò arregraïr era collaboracion des supermercats deth territòri atau coma eth trabalh des persones volontàries qu’ajudaran pendent aguesti dies ena remassada d’aliments.