Imatge virtuau dera zòna d’estada dera Artiga de Lin.

Eth Conselh a inicat aguesta setmana es òbres ena Artiga de Lin d’ua zòna d’estada gratuïta (150 places) damb servicis sanitaris e d’un Centre d’Interpretacion multi usatges qu’anarà plaçat ena part superiora dera actuau ermita dera Mair de Diu dera Artiga.

Ua part deth finançament d’aguestes òbres provien des hons FEDER dera Union Europèa, era rèsta ei finançada peth Conselh Generau d’Aran.

Entad aguest projècte s’a compdat damb era collaboracion des Ajuntaments de Vielha e Mijaran e d’Es Bòrdes e dera EMD d’Aubèrt e de Vilac.

Eth dessenh tant dera zòna d’estada coma deth Centre d’Interpretacion a priorizat er objectiu dera foncionalitat e dera sua integracion ar entorn naturau dera Artiga.

En paraules deth sindic d’Aran, Carlos Barrera, “er objectiu ei potenciar toti es valors naturaus e païsatgistics dera Ribèra dera Artiga de Lin qu’ei ua des zònes mès visitades dera Val d’Aran”.

Es òbres an d’èster finalizades abans deth mes en noveme d’enguan e eth sòn pressupòst ei de:

– Zòna d’estada gratuïta damb servicis sanitaris: 299.807,00 èuros
– Centre d’Interpretacion multi usatges: 132.948,33 èuros