• Es trabalhs d’extraccion s’an iniciat ena pista forestau de Tuca-Pontet, a on se prevé remassar 650 m³ de husta procedent d’arbes damb mens de 28 cm de diametre previament marcadi, d’acòrd damb es estudis realizadi pes tecnics responsables deth projècte, e que s’aprofitaràn entà alimentar caudères de biomassa coma era qu’actuaument s’installe en Espitau Val d’Aran

• Eth projècte de gestion forestau desvolopat peth Conselh Generau d’Aran, damb era collaboracion des Ajuntaments e EMD’s deth territòri, a coma objectiu poder gestionar es recorsi forestaus dera Val d’Aran mejançat ua silvicultura activa, respectuosa damb era biodiversitat e generadora de lòcs de trabalh

Eth Conselh Generau d’Aran a començat dejà es trabalhs d’extraccion de husta entath sòn profitament ena pista forestau de Tuca-Pontet, damb un airau de trabalh limitat a 25 mètres per dessús e 45 m per dejós dera pista.

“Er objectiu d’aguesti pumèri trabalhs ei remassar un volum de husta de 650m³ entà convertir-les en estèra e que mos servisquen entà alimentar caudères de biomassa coma era que s’installe en Espitau Val d’Aran”, manifestaue era sindica d’Aran, Maria Vergés, en tot híger que: “deth Conselh Generau d’Aran ençà trabalham des de hè mès d’un an damb es Ajuntaments e EMDs d’Aran en ua naua estrategia forestau que se base en un profitament sostenible des nòsti recorsi, en tot apostar pera bioeconomia e es energies renovables ath madeish temps que suenham es nòsti bòsqui e diversificam era nòsta economia”.

Pera sua part, eth conselhèr de Territòri, Paisatge e Gestion Ambientau, Francés Bruna, explicaue que: “en aguesti moments, era husta damb era que trabalham ei era procedenta d’arbes de mens de 28 cm de diametre, previament mercadi segontes er estudi amiat a tèrme pes tecnics responsables deth projècte, que posteriorment ei transportada enquiath Centre de Logistica de Biomassa, en Les, qu’entrarà en foncionament enes pròplèu mesi”.

Damb aguesti trabalhs, se met en foncionament eth projècte de gestion forestau deth Conselh Generau en collaboracion damb es Ajuntaments e EMD’s deth territòri, que se correspon damb  ua vision de futur de gestion sostenible dera Val d’Aran e que cerque disminuir era depenencia des combustibles fossils, ath madeish temps que s’apòste per ua ua energia mès barata, renovable e damb mens emissions e qu’ajude a melhorar era resiliéncia des nòsti bòsqui.