• Aguesta campanha, impulsada amassa damb Ecovidrio, a coma finalitat informar a mès de 250 establiments otelèrs e de restauracion dera Val d’Aran sus era corrècta separacion des residus d’envasi de veire e potenciar era dotacion d’infraestructures entà facilitar era separacion e eth transpòrt d’aguesti residus enquiath contenedor

Eth Conselh Generau d’Aran a metut en foncionament ua campanha informativa adreçada as establiments d’ostalaria e restauracion aranesi damb er objectiu de facilitar-les eth reciclatge des residus de veire.

Era iniciativa s’alongarà d’aguest mes de hereuèr enquiara fin dera tempsada d’iuèrn. En aguest periòde, ua equipa d’informadors ambientaus acreditadi visitaran mès de 250 establiments deth territòri (principaument bars, cafeteries e restaurants) damb era finalitat d’informar-les sus era corrècta separacion des residus d’envasi de veire e rebrembar-les es obligacions qu’an es establiments comerciaus en matèria de gestion de residus.

En aguest sens, se harà incidéncia en compliment dera normativa vigent en Catalonha e en municipi, que dispause era obligatorietat de separar en origen es residus. Per açò, pendent era campanha se verificarà en sucessives visites s’es establiments hen ua corrècta separacion des residus d’envasi de veire que generen.

Dempús d’ua prumèra fasa d’informacion e analisi des besonhs, era campanha tanben vò potenciar era dotacion d’infraestructures entà facilitar era separacion e eth transpòrt des residus de veire enquiath contenedor. Per açò, gràcies ara collaboracion damb era entitat sense anim de lucre Ecovidrio, se liurarà de forma gratuïta as establiments qu’ac solliciten recipients de diferents capacitats en foncion deth volum de residus que generen.

Ath delà, eth trabalh de camp tanben permeterà detectar es airaus d’aportacion de contenedors a on serà avient plaçar naui contenedors de veire damb sistèma d’elevacion entà facilitar eth uedatge de granes quantitats de residus de veire, un hèt que facilite eth reciclatge as grani generadors d’aguest residu coma son bars e restaurants.

Aguesta campanha s’enquadre laguens dera volentat deth govèrn aranés e d’Ecovidrio d’impulsar mesures dirigides a fomentar era remassada selectiva de residus. En aguest sens, eth sector dera ostalaria e era restauracion genère lèu eth 50% des residus d’envasi de veire d’un unic emplec que se comercializen en tot er Estat, motiu peth quau ei un sector clau. Arténher eth compromís des professionaus deth sector e assolidar abits sostenibles supause ua melhora significativa ena luta contra eth cambi climatic.