• Aguesta accion s’emmèrque en d’autes enes qu’eth govèrn trabalhe, e presentarà en brèu, entà impulsar era melhora deth servici, entà adaptar-lo ara realitat deth territòri e des exigéncies en matèria de sostenibilitat ambientau

Eth Conselh Generau d’Aran implemente en municipi de Vielha e Mijaran ua pròva pilòt entà minimizar er impacte visuau des ièrles de contenedors, en tot plaçar un barrament de husta mès estetic

“Eth principau objectiu deth govèrn deth Conselh Generau ei melhorar era imatge des ièrles de residus enes poblacions en tot apostar per un sistèma que sigue compatible damb un foncionament corrècte deth nòste servici de remassada de lordères, pr’amor d’açò auem començat damb ua prumèra pròva pilòt en Vielha que demoram que pogue hèr-se extensibla a tota era Val d’Aran” , explicaue eth conselhèr de Territòri, Paisatge e Gestion Ambientau, Oriol Sala.

Entara implementacion d’aguesta pròva pilòt, eth govèrn d’Aran compde damb eth supòrt e collaboracion der Ajuntament de Vielha e Mijaran, que corbís eth 50% der impòrt d’aguesta implementacion.

En aguest sens, Sala a volut arregraïr “era collaboracion der Ajuntament de Vielha e Mijaran que d’un prumèr moment, a accedit non sonque a esdevier er scenari d’aguest pilòt, senon qu’a finançat eth 50% der impòrt totau”.

Peth sòn costat, era sindica d’Aran, Maria Vergés, asseguraue que: “en un territòri coma eth nòste, a on er auviatge naturau e er atractiu toristic ei tant important, deth govèrn deth Conselh Generau ençà pensam qu’ei de besonh aplicar mesures entà melhorar er impacte visuau d’elements coma es contenedors, e aguest sistèma mos semble fòrça avient e que s’adapte fòrça ben as nòsti pòbles”.