• En tot cercar promocionar e dar a conéisher era istòria deth nòste territòri e eth nòste auviatge culturau, eth Conselh Generau d’Aran a amiat a tèrme un video divulgatiu e que rebastís aguesta fortalesa basant-se ena documentacion grafica, plans e descripcions escrites, resultat des cataments arqueologics e ua comparativa damb d’autes fortificacions dera madeisha epòca. Ath delà, tanben se plaçaràn diuèrsi pannèus informatius que permeten compréner melhor es roeines dera major fortalesa d’Aran.

Eth Conselh Generau d’Aran e er Ajuntament d’Es Bòrdes amièren a tèrme, dissabte passat, un acte de presentacion deth video dera reconstruccion virtuau deth Castèth Leon d’Es Bòrdes, atau coma des accions previstes en aguest endret entà méter en valor aguest monument istoric der auviatge aranés.

Aguest castèth, que date de 1283, siguec era sedença deth governador, representant militar e cap dera administracion reiau en Aran. En sègle XVI, es guèrres que Carles I e Felip II d’Espanha amièren contra França, convertiren Castèth Leon en ua des mès importantes fortaleses dera termièra. Per aguest motiu, eth castèth siguec objècte de diuèrses e plan importantes òbres de refortilhament. En sègle següent, en cors des guèrres des Segadors (1640-1652) e de Succession (1701-1715) eth castèth siguec scenari de sagnoses lutes. Fin finau, siguec abandonat e destruit en 1719 pes tròpes franceses entà evitar futurs fòcus de resisténcia e, damb es pèires des sues roeines, se bastiren era glèisa e es prumères cases deth pòble.

“Deth govèrn Conselh Generau d’Aran ençà consideram eth suenh e promocion deth nòste auviatge culturau un des nòsti pilars fonamentaus, per aguest motiu, era metuda en valor deth Castèth Leon ère e ei un ahèr primordiau, pr’amor qu’es sues rèstes son eth testimòni de fòrça segles dera nòsta istòria, que consideram de besonh dar a conéisher”, afirmaue era sindica d’Aran, Maria Vergés, en tot híger que: “ath delà, damb accions coma aguesta volem tanben diversificar es punts d’interès deth nòste territòri coma destinacion toristica e promocionar es atractius des nòsti pòbles”.

Entà promocionar aguest endret, s’a amiat a tèrme un video divulgatiu sus es hèts mès relevants de Castèth Leon que se poderà consultar a trauès d’un còdi QR e se plaçaràn tanben uns pannèus informatius entà compréner melhor es roeines.

Eth vidèu, òbra de Axel Dettoni e basat ena documentacion grafica, plans e un auçat deth castèth de 1594, descripcions escrites, resultats des cataments arqueologics e ua comparativa damb d’autes fortificacions dera madeisha epòca, ei disponible en 5 lengües (aranés, catalan, castelhan, anglés e francés) e dejà se pòt visualizar en canal de YouTube deth Conselh Generau d’Aran.

Aguest projècte s’enquadre laguens des accions desvolopades a trauès deth Plan de Sostenibilitat Toristica dera Val d’Aran, finançat peth Ministèri d’Industria, Comèrç e Torisme, era Generalitat de Catalunya e eth Conselh Generau d’Aran.