• Pendent aguesta setmana s’a installat ua webcam entà per’mor de melhorar era prediccion de lauegi e era viabilitat dera carretèra C-28 ath sòn pas peth Pòrt dera Bonaigua

• Un còp avalorada era sua efectivitat pendent aguest iuèrn, se prepausarà era installacion d’autes estacions webcam en diuèrsi punts dera Val d’Aran

Frut dera estreta collaboracion entre eth Centre de Lauegi deth Conselh Generau d’Aran e era empresa Arantec- Smarty Planet, s’a installat ua webcam experimentau entà per’mor de melhorar era prediccion de lauegi e era viabilitat dera carretèra C-28 ath sòn pas peth Pòrt dera Bonaigua.

Se tracte d’ua estacion leugèra alimentada per bateries e panèus solars qu’envie fotografies panoramiques cada 30 menutes e permet as tecnicians deth Conselh Generau auer donades precises e periodiques dera distribucion dera nhèu e era activitat de lauegi en un sector dera val de Ruda.

Aguesta tecnologia a estat desvolopada pera empresa d’engenharia aranesa Arantec- Smarty Planet e hè part dera sua ampla gamma d’estacions remotes aplicades a diuèrsi encastres de monitorizacion deth miei fisic.

Un còp avalorada era sua efectivitat pendent aguest iuèrn, se prepausarà era installacion d’autes estacions webcam en diuèrsi punts dera Val d’Aran.

Eth sindic d’Aran, Carlos Barrera, a manifestat “era equipa de Govèrn deth Conselh Generau d’Aran seguís trabalhant damb er objectiu de garantir ath maximal era prevencion e deteccion de risqui naturaus deth territòri aranés. Aguesta informacion fonamentau entà accions de prevencion e alèrta deuant es risqui a estat enfortida damb era incorporacion d’un tecnician de Proteccion Civiu arraïtz des transferéncies artenhudes peth Conselh Generau d’Aran ena darrèra Comission Bilaterau Generalitat de Catalonha- Conselh Generau d’Aran”.

Entà veir era webcam: http://conselh.smartyplanet.com/ ò http://conselh.smartyplanet.com/oc/estacions/estacio/177/fitxa/560