• Era sindica d’Aran s’amassaue diuendres passat amb era naua presidenta dera Corporacion Catalana de Mejans Audiovisuaus ena qu’instèc ara CCMA a incrementar eth volum de materiau audiovisuau ena nòsta lengua, non sonque en productes informatius, senon tanben d’entreteniment e animacion infantila entà complir damb çò qu’establís era lei, e manifestèc era preocupacion deth govèrn d’Aran pera situacion d’infradotacion de recorsi umans des delegacions de Catalunya Radio e TV3 en Aran

Era sindica d’Aran, Maria Vergés, mantenguec era passada setmana ua amassada telematica damb era naua presidenta dera Corporacion Catalana de Mejans Audiovisuaus (CCMA), Rosa Romà, damb qui tractèc diuèrsi ahèrs relacionadi damb era preséncia der aranés enes mieis dera Corporacion.

Pendent aguesta amassada, era sindica d’Aran dèc a conéisher ara presidenta dera CCMA era delicada situacion que trauèsse er aranés, qu’actuaument non arribe a un 20% d’emplec sociau e instèc ara Corporacion a reforçar er emplec dera nòsta lengua, en tot assegurar que: “deth govèrn deth Conselh Generau d’Aran ençà entenem es mieis de comunicacion coma un esturment fòrça valuós de normalizacion e foment dera lengua, qu’an d’ajudar a impulsar eth sòn coneishement e contribuïr ara sua perviuença”.

“Actuauments era Corporacion trabalhe en sòn Plan Estrategic e en barrament deth contracte programa, un Plan qu’a d’inclodir un cambi ena situacion der aranés enes mieis de comunicacion dera corporacion en tot aumentar-ne era preséncia”, afirmaue era sindica, en tot híger que: “era Lei d’Aran reconeish en sòn article 8.1 qu’er aranés ei era lengua d’usatge normau des mejans de comunicacion publics en toti es formatis, especiaument des depenenti dera CCMA, e era preséncia actuau der aranés non ei sufisient” ath temps qu’incidie en que “ ei fòrça de besonh incrementar eth volum de materiau audiovisuau ena nòsta lengua, non sonque en productes informatius, senon tanben de programacion d’entreteniment e animacion entara mainadèra”.

Ath delà, Vergés tanben transmetèc ara presidenta era sua preocupacion per estat der equip de Catalunya Radio e era delegacion de TV3 en Aran, qu’an de besonh refoçar es sòns equips entà qu’era manca de recorsi umans e era cobertura des territòris vesins non vagen en detriment d’aguesti mejans dejà emblematics e fòrça representatius dera nòsta societat. Atau madeish, autant per çò que hè ara ràdio e television, aguesti son dus esturments elementaus en procès de normalizacion dera lengua e, en cas d’Aran, an d’auer un tractament diferenciat dera rèsta de Catalunya.

Era sindica volec arregaïr ara presidenta “era sua predisposicion a escotar es nòsti besonhs e trabalhar amassa damb eth Conselh Generau d’Aran entà reforçar era preséncia der aranés entà contribusir a mantier era nòsta lengua viva” e s’emplacèren a continuar trabalhant en aguest ahèr pendent aguesta tardor.

Vielha, 15 de seteme de 2022