• Aguest nau espaci web melhore era accessibilitat des usatgèrs e usatgères en tot perméter realizar tramits basics online coma demanar cita entà diuèrsi airaus, ath delà aufrís informacion sus eth sistèma assistenciau integrat unic d’Aran Salut, atau coma de toti es centres que lo conformen e es servicis qu’aufrissen

A compdar d’aué ei dejà en foncionament era naua web de Benèster e Salut deth Conselh Generau d’Aran, un nau esturment en qu’es professionaus d’Aran Salut pòrten mesi trabalhant e qu’a coma principau objectiu melhorar era accessibilitat des usatgèrs e usatgères e méter en valor eth sistèma sanitari e sociau integrat dera Val d’Aran.

A trauès d’aguest espaci, es visitants dera web poiràn trapar informacion sus eth sistèma assistenciau integrat d’Aran Salut, atau coma de toti es centres que lo conformen e es servicis qu’aufrissen. Se da tanben accés a diuèrsi tramits online coma demanar ora en Centre d’Atencion Primària, demanar dera Targeta Sanitària Individuau, descargar eth certificat COVID EU o sollicitar cita entà renauir eth permís de conduïr o eth permís d’armes, entre d’auti.

Ath delà, era web compde tanben damb un apartat de Trabalha damb nosati entà publicar es aufèrtes e convocatòries de trabalh d’Aran Salut e entà qu’es professionaus que volguen poguen enviar eth sòn curriculum.

“Aguesta naua web ei un auanç important entà apropar eth nòste sistèma sanitari e sociau ara ciutadania e modernizar e actualizar era atencion ar usatgèr ena linha que trabalhe eth govèrn deth Conselh Generau d’Aran de consolidar aguest sistèma en tot plaçar as usatgèrs en centre dera gestion”, afirmaue era sindica d’Aran, Maria Vergés.

Era naua web d’Aran Salut se trape en ua prumèra fasa de desvolopament, çò que vò díder qu’enes pròplèu mesi se trabalharà entà ampliar es sòns servicis e adaptar-se melhor as besonhs des sòns usatgèrs e usatgères.

Consulta era naua web d’Aran Salut aciu: salut.conselharan.org