• Damb eth projècte de valorizacion toristica deth refugi dera Honeria e er entorn dera Val de Toran, que se prevé que finalize a finaus d’aguest mes, eth Conselh Generau d’Aran cerque potenciar aguesta zòna de forma responsable e sostenible

Eth Conselh Generau d’Aran a dubèrt eth procés de licitacion der arrendament deth Refugi dera Honeria entara sua gestion e explotacion. Eth pressupòst totau dera licitacion ei de 135.000 euròs e era durada deth contracte ei de 8 ans. Es interessadi pòden presentar es sues aufèrtes enquiath 10 de junh entàs 23:59 ores.

En aguesti moments, es òbres que s’amien a tèrme en aguest refugi se trapen ena darrèra fasa e ei previst que siguen finalizades a finaus d’aguest mes de junh. En aguest sens, era sindica d’Aran, Maria Vergés, afirmaue que: “aguest projècte de melhora non afècte sonque ath Refugi dera Honeria, senon que tanben s’an amien a tèrme seguit d’actuacions de condicionament enes camins istorics dera Val de Toran e era senhalizacion d’itineraris de senderisme, qu’ajudaràn a potenciar eth desvolopament toristic dera zòna d’ua forma responsable e sostenible”.

Es actuacions de recuperacion, condicionament e senhalizacion des camins de Grauèrs, Bedreda e eth camin dera presa de Barrier a Pradet, haràn qu’era aufèrta toristica d’aguest paratge sigue mès atractiva e variada entàs usatgèrs.  En çò que tanh ath refugi, non s’a amiat a tèrme ua ampliacion, senon un renauiment e adequacion, de forma qu’eth nombre de places se manten mès s’an realizat ua sèria de melhores, pr’amor qu’era installacion ère obsoleta dempús de vint ans aufrint servici.

Damb eth supòrt deth Departament d’Empresa i Coneixement dera Generalitat de Catalunya, e eth programa Leader deth Departament d’Agricultura, Ramaderia, Pesca i Alimentació.