Vielha, 14 de hereuèr de 2018.- Eth Conselh Generau d’Aran a trèt a licitacion es òbres entà bastir eth dusau quirofan e eth traslat deth laboratòri e er airau d’analitiques der Espitau dera Val d’Aran per un impòrt de 780.713 €.
Er Espitau dera Val d’Aran compdarà damb un blòc quirurgic e obstetric totauments renauit ena actuau bastissa, pr’amor es òbres serviràn ta reformar eth quirofan existent e bastir-ne un de nau.
Eth sindic d’Aran, Carlos Barrera, expliquèc que pendent era comission bilaterau Conselh Generau d’Aran – Generalitat deth mes de junh passat s’acordèc era transferéncia de 500.000 èuros mès entàs òbres de melhora der Espitau dera Val d’Aran, que se somèren as 800.000 € que ja disposauen entà executar aguesti trabalhs. Eth sindic d’Aran ahigec qu’era prevision ei qu’es òbres siguen acabades en estiu deth 2019 e qu’atau se pogue compdar damb dus espacis quirurgics totauments renauidi ena epòca de maximala afluéncia de visitants ena Val d’Aran. Es òbres de remodelament der ancian quirofan s’amiaràn a tèrme un còp age passat er iuèrn que ven, entà poder garantir ath maxim era disponibilitat d’un espaci entà realizar intervencions quirurgiques.
Carlos Barrera manifestèc tanben qu’er airau d’analitiques se transportarà ar espaci qu’aucupauen enquiara es servicis administratius e de direccion der espitau e que totes es accions que demoren entà melhorar er equipament seràn coordinades entà qu’agen era minima afectacion entàs usatgèrs.
Es servicis administratius e de direccion der espitau dera Val d’Aran, enes que i trabalhen 11 persones, aucuparàn un locau de dues plantes damb un totau de 287m, aquerit peth Conselh Generau d’Aran, damb ajuda en finançament dera Deputacion de Lhèida. Disposarà des burèus des servicis administratius e de direccion der espitau e deth servici aranés de Benestar e Salut, tres sales de reünions multiusi e er archiu der espitau. Eth traslat se harà efectiu aguest mes de hereuèr. Eth Govèrn d’Aran a destinat un pressupòst de 123.953 € ena reforma interior des naues installacions.