• Pendent era serada d’ager, s’amièc a tèrme era ceremònia de liurament des prèmis dera XXIau edicion deth concors Aran de Literatura, que demorèc ajornada pr’amor dera situacion sanitària, e s’a arregraït era participacion a toti es autors e autores atau coma as membres deth jurat qu’an escuelhut es òbres guanhadores
• Aguest concors literari, organizat peth govèrn deth Conselh Generau d’Aran, a coma objectiu promòir er usatge dera lengua pròpria d’Aran ena literatura

Ager pera tarde auec lòc, ena glèisa de Mijaran de Vielha, era ceremònia de liurament des XXIau Prèmis Aran de Literatura, eth concors literari organizat peth Conselh Generau d’Aran damb er objectiu de promocionar er usatge dera lengua pròpria d’Aran a trauès dera escritura. Aguest acte siguec presidit pera sindica d’Aran, Maria Vergés, e a compdat damb era preséncia des conselhèrs e conselhères de govèrn Amador Marqués, Angelina Cases e Josep Canut.

“Deth Conselh Generau d’Aran ençà volem felicitar a toti es guanhadors e guanhadores d’aguesta XXIau edicion d’Aran de Literatura, autant coma a toti es autors e autores qu’an participat que, damb es sues òbres demòstren eth sòn compromís damb era cultura e lengua araneses, e que mos dèishen un auviatge culturau plan important e de besonh, pr’amor qu’era delicada situacion que patís era nòsta lengua pròpria requerís, mès que jamès, deth compromís dera ciutadania entà potenciar-la e esvitar era sua desparicion”, afirmaue era sindica d’Aran, Maria Vergés, e tot arregraïr tanben “as membres deth jurat d’aguesti Prèmis era sua dedicacion, pr’amor que, sense eth sòn trabalh desinteressat, aguest concors non serie possible”.

Es premiadi e premiades d’aguesta XXI edicion an estat:

Categoria Poesia:

• Prumèr prèmi ath poèma “Gois”, de Xavi Gutiérrez.
• Finalista ath poèma “Peades en Sable”, de Marcos Nart Moga.
• 1èr accèssit ath poèma “Un guardader privilegiat”, d’Ester Martínez.
• 2au acccèssit ath poèma “L’aveniment d’un poder navèth”, d’Amy Cros.

Categoria Novèlla Juvenilla:

• Prumèr prèmi ara òbra “Qué serà de jo!”, d’Ana Sanz Rodríguez.
• Finalista ara novèlla “Era lutz s’amòrte”, de Maria Sanz Rodríguez.

Categoria Narracion:

• Prumèr prèmi ara òbra “Eth caçaire”, de Tòni Escala.
• Finalista ara òbra “Lo Hasan Roge”, de Jessyka Rojo e David Escarpit.
• 1èr accèssit ara òbra “L’estiu au Ròi”, de Renaud Delisee.

Enguan, pr’amor dera situacion sanitària que s’a viscut, se decidic ajornar es prèmis Mossen Condò Sambeat, Prèmi de Diboish ena Escòla e Festivau de Teatre tà quan era situacion pandémica melhorèsse.