• Aguest projècte complemente era installacion dera caudèra de biomassa der Espitau, que forme part deth Plan de Gestion Forestau qu’eth govèrn deth Conselh Generau desvoloparà a compdar d’aguest 2021 en collaboracion damb es ajuntaments e EMD’s deth territòri, en tot apostar atau pes energies renovables, era bioeconomia e eth suenh des nòsti bòsqui

Eth govèrn deth Conselh Generau d’Aran a aprovat eth projècte executiu entara implementacion d’un sistèma de contròl e gestion dera emission de calor ena installacion dera calefaccion der Espitau Val d’Aran.

Aguest projècte a coma principau objectiu melhorar era eficiéncia energetica der Espitau mejançant diuèrses actuacions coma era incorporacion de valvules termostatiques e actuadors electrotermics enes radiadors, era installacion de diuèrsi termostats en diferents endrets dera bastissa, era substitucion de bombes circuladores o era installacion de quadres de contròl des caudères, entre d’autes. Toti aguesti elements, s’integraràn en un sistèma de telegestion e contròl que permeterà operar d’ua forma mès practica e controlada, en tot operar damb major eficiéncia energetica.

Aguest projècte, en quau s’invertiràn mès de 175.000 euròs finançadi laguens deth PUOSC dera Generalitat de Catalunya, complemente era installacion dera caudèra de biomassa der Espitau Val d’Aran, damb era quau se substituirà eth gasòil coma combustible pera matèria organica que trapam enes bòsqui dera Val d’Aran.

En aguest sens, eth conselhèr de Territòri, Paisatge e Gestion Ambientau, Francés Bruna, afirmaue que “eth profitament dera biomassa mos permet produsir ua energia mès barata, renovable e damb mens emissions e, ath delà, mos ajude a mantier nets es nòsti bòsqui, çò que contribuís a previer incendis”, e higie que: “era estrategia forestau ena que trabalham des deth govèrn deth Conselh Generau a coma principau objectiu amiar a tèrme un profitament sostenible des nòsti bòsqui, en tot melhorar, per ua part, era nòsta qualitat ambientau e, per ua auta, era economia deth territòri, pr’amor qu’era biomassa ei un recors abondiu en Aran que sonque mos cau saber emplegar”.

En aguesti moments, dejà an gessut a licitacion autant es òbres d’installacion dera caudèra de biomassa entar Espitau Val d’Aran coma es trabalhs d’adequacion entath Centre de Logistica de Biomassa, en pòble de Les. Aguestes infraestructures permeteràn generar ua economia verda ath torn des montanhes e arténher uns bòsqui mès resilients ath cambi climatic e as incendis forestaus.