• Aguest espaci ei a disposicion des persones emprenedores, petites empreses, startups o professionaus independents qu’agen de besonh un lòc fisic a on desvolopar es sòns projèctes, en tot compartir ideès e crear un hilat que fomente era innovacion en territòri

• Entà poder accedir ath coworkig, ei de besonh ramplir un formulari que se facilitarà a trauès der email infohepic@aran.org, eth telefòn 667 670 271 o ena plana web de HèPic

Dempús d’auer aprovat, eth passat 5 de mai, ena session extraordinària deth Plen deth Conselh Generau d’Aran eth reglament des espacis coworking dera Val d’Aran, era maxima institucion aranesa met, a compdar d’aué, en foncionament eth coworking deth HUB d’innovacion rurau HèPic, plaçat ena carretèra de Gausac 1, baishi (Vielha).

“Aguest nau espaci ei ua mòstra dera apòsta deth Conselh Generau d’Aran pera creacion, implantacion e expansion de projèctes innovadors e sostenibles damb impacte positiu ena Val d’Aran, e damb era sua implementacion volem aufrir a persones emprenedores, petites empreses, startups o professionaus independents un lòc fisic a on trabalhar, compartir idèes e materializar eth sòn projècte damb eth supòrt dera administracion”, manifestaue era sindica d’Aran, Maria Vergés.

Eth coworking compde damb ua sala compartida, dues sales de reünions, sala de formacion e eveniments, e tanben un burèu entà auer amassades privades. Aguest entorn propici entath desvolopament de naui projèctes estimule era flexibilitat, eth dinamisme e era innovacion coma motors de creativitat e collaboracion.

Entà poder accedir ath coworkig, ei de besonh ramplir un formulari que se facilitarà a trauès der email infohepic@aran.org, eth telefòn 667 670 271 o ena plana web de HèPic. En cas que i age un nombre superior de sollicituds que de places liures, se priorizaràn es projèctes mès innovadors.