• Eth govèrn d’Aran, a trauès de Musèus Val d’Aran, a metut en foncionament aguest nau sistèma qu’a coma principau objectiu establir un contròl efectiu en aforament de totes es sues installacions entà evitar es aglomeracions enes diferentes visites e activitats

Eth Conselh Generau d’Aran, a trauès de Musèus Val d’Aran, a metut en foncionament un nau sistèma de resèrves que permet crompar en linha es entrades d’ua forma mès comòda, rapida e segura.

Un des objectius principaus d’aguest sistèma de resèrves ei establir un contròl efectiu en aforament de totes es sues installacions entà evitar es aglomeracions enes diferentes visites e activitats.

Ath delà, aguesta plataforma digitau servirà entà dar a conéisher era aufèrta culturau qu’auferís eth Musèu dera Val d’Aran, ath madeish temps que permet dar ua ampla informacion de toti es equipaments e des activitats que s’amiaràn a tèrme ath long de tot er an. Laguens deth portau, es visitants se poderàn descargar es oraris de cada sason, es mesures entara prevencion dera Covid-19, mès tanben auer un prumèr contacte damb es equipaments a visitar, en tot poder accedir a imatges e videos d’aguesti.

D’ua forma fòrça intuitiva podem hèr era nòsta resèrva. Com?

En prumèr lòc veiratz quate categories: Musèus, Romanic, Activitats e Nauetats. Seleccionatz era que vos interèsse e se dauriràn es recorsi culturaus aufertadi en aguest moment. Laguens der equipament escuelhut, seleccionaram eth dia e era ora dera visita, atau coma eth nombre de persones en foncion deth tipe d’entrada (normau o redusida). Ara seguida, mos registram, validam eth nòste usatgèr e, un viatge hèt açò, se procedís ath pagament. Aguest pagament en linha ei 100% segur e mos permeterà formalizar era resèrva e arténher eth nòste “BONO” damb tota era informacion de besonh entà realizar era visita. Calerà presentar aguest “BONO” en format digitau ena entrada dera installacion.

Aguesta iniciativa s’a creat es darrèri mesi peth besonh de desvolopar ua milhor gestion der aforament enes equipaments deth hilat de Musèus dera Val d’Aran, en un moment a on era distància sociau ei imprescindibla. Aguesta mesura tanben preten evitar, ena mesura de çò possible, er intercambi de sòs en efectiu. En aguesta linha, des deth Musèu dera Val d’Aran se trabalhe des de hè quauqui mesi ena implementacion dera plataforma que ja ei ua realitat.

Dejà la podetz visitar e reservar en linha, en ligam: http://museus.conselharan.org