• Aguesta pròva pilòt ei resultat der escambi d’experiéncies entre eth Conselh Generau d’Aran, Generalitat de Catalunya e era Junta de Castilla y León amiat a tèrme eth passat mes de noveme en León, a on er emplec de cans de proteccion ei implementat de hè fòrça ans e da boni resultats, en tot facilitar era convivéncia entre ramaderia e fauna suvatja

Eth Conselh Generau d’Aran a metut en foncionament un plan pilòt entà protegir ath bestiar gròs de possibles atacs d’os damb cans de proteccion, ua mesura implementada en territòris coma Castilla y León damb fòrça boni resultats.

Eth Conselh Generau d’Aran, era Generalitat de Catalunya e era Junta de Castilla y León participèren pendent eth passat mes de noveme en un escambi de coneishements e experiéncies sus era convivéncia dera ramaderia e era fauna sauvatja, en tot visitar diuèrses explotacions ramadères e apicòles de León e metent en comun diferents linhes de trabalh en aguesta matèria, entre eres, er emplec de cans de proteccion.

A trauès d’aguesta pròva pilòt, eth Conselh Generau d’Aran a metut a disposicion d’un ramadèr de Les tres cadeths de mastin deth Pirenèu entà iniciar eth periòde d’implementacion damb un ramat equin, aguesta implementacion consistís ena adaptacion des cans as shivaus entà establir un vincle damb eri peth quau desvoloparàn un instint de proteccion.

Ath delà, s’a metut tanben a disposicion d’un ramadèr en Mont un aute can de proteccion de sies ans e damb experiéncia prèvia entà implementar ena sua cavalada.

“Deth Conselh Generau d’Aran ençà portam fòrça temps trabalhant intensament entà trapar solucions ara problematica des atacs d’os a bestiar gròs que venguem patint es darrèri ans e pensam qu’aguesta forma de proteccion poderie èster ua bona solucion” afirme eth conselhèr de Territòri, Paisatge e Gestion Ambientau, Francés Bruna, qu’a volut tanben “arregraïr era predisposicion des dus ramadèrs qu’an accedit a collaborar damb nosati entà implementar aguesta pròva pilòt damb es cans de proteccion”.