• Aguest projècte d’atencion ara joenessa ei adreçat as persones d’entre 16 e 30 ans, especiaument aqueres problèmes de salut mentau, que receberàn un acompanhament entà arténher ua autonomia personau e ua melhora dera sua qualitat de vida, e se les balharàn es recorsi de besonh adaptadi as sues inquietuds, motivacions e interèssi

Eth Conselh Generau d’Aran, a trauès de Servicis Assistenciaus Integrats d’Aran, a metut en foncionament eth programa Audèth de Huec entà fomentar eth benestar e era salut mentau dera joenessa en nòste territòri.

“Aguest programa, que se desvolòpe amassa damb es territòris deth Naut Pirenèu, cèrque dar responsa as besonhs derivadi deth caumatge juvenil e der abandonament prematur des estudis, que soent se relacionen damb ua deterioracion ena salut mentau e fisica d’aguesti joeni e joenes, damb probabilitats mès nautes de patir caumatge de longa durada, damb auer salaris baishi o condicions de trabalh precàries, entre d’auti”, afirmaue era conselhèra de Joenessa, Igualtat e Inclosion Sociau, Maria Menis.

“Entath govèrn deth Conselh Generau d’Aran ei prioritari méter en centre des politiques era atencion as persones e, per aguest motiu, pensam qu’ei fòrça important velhar peth benestar e era salut fisica e mentau dera nòsta joenessa”, asseguraue era sindica d’Aran, Maria Vergés, en tot híger que: “demoram, damb aguest programa, poder-les aufrir un esturment d’utilitat entà entà arténher era sua insercion laborau o era recuperacion deth sòn itinerari formatiu e que i poguen trapar un espaci a on interactuar damb d’auti joeni, informar-se des recorsi e oportunitats deth territòri, exposar es sues idees e crear ua comunitat”.

Ena Val d’Aran, era joenessa interessada en aguest programa receberà acompanhament individuau ath madeish temps qu’aurà espacis gropaus de trobada que les permeten téisher un hilat de supòrt. Açò se harà mejançant activitats diuèrses e adaptades as inquietuds, motivacions e interèssi dera joenessa.

Totes es persones joenes dera Val d’Aran que volguen participar en programa, i pòden contactar a trauès deth corrèu en audethdehuec@aransalut.com, per miei d’un WhatsApp en 6654030713 o presenciauments en Punt de Trobada “Eth Nin des Joeni” (Carrèr Pomaròla, 12, baishi. Vielha). Es atencions se hèn abituauments en espaci deth Punt de Trobada, mès i a era possibilitat qu’eth personau se desplace tà un aute endret jos demanda. Tanben se pòden informar de totes es activitats e nauetats deth programa a trauès der Instagram @ocelldefoc_altpirineuiaran.

Aguest ei un projècte que se desvolòpe amassa en Naut Pirenèu e Aran. Ei format per ua entitat guida, Alba Jussà, qu’ei era representanta dera agropacion e coordine es autes entitats sentinèla que formen part deth grop, totes eres impulsores deth projècte. Aguestes entitats sentinèla son Associació Reintegra (Pallars Jussà e Sobirà), Fundació Antisida Lleida (Alta Ribagorça), Fundació Privada ADIS (Cerdanya), Fundació Privada Integra Pirineus (Alt Urgell) e Aran Salut (Val d’Aran). Parallèlament, tanben formen part deth programa es entitats satellit, qu’an era foncion de dar supòrt ath projècte e l’acompanhen entà afavorir-ne eth succès e era viabilitat.