• Aguest projècte pilòt consistís en fixar un orari limitat (d’11h00 a 12h00) de dipòsit des cartons generadi pes comerçants en tot facilitar ua recuelhuda agila que permeterà mantier es carrèrs nets era major part deth dia.

Eth Conselh Generau d’Aran, en collaboracion damb er Ajuntament de Vielha e Mijaran, inicièc eth dia 19 d’octobre un servici de recuelhuda comerciau “pòrta a pòrta” dera fraccion papèr/carton en nuclèu de Vielha.

Aguesta naua recuelhuda comerciau s’enquadre laguens deth contracte de gestion integrau dera recuelhuda e evacuacion de residus solids urbans dera Val d’Aran que se metec en foncionament eth passat mes de gèr.

Aguest projècte pilòt consistís en fixar un orari limitat (d’11h00 a 12h00) de dipòsit des cartons generadi pes comerçants en tot facilitar ua recuelhuda agila que permeterà mantier nets e endreçadi es carrèrs deth municipi era major part deth dia. Damb aguest modèl ei de besonh eth rigor e eth compliment der orari per part des comerçants, tot çò que se depausarà passades es 12h00 deth meddia non serà arrecuelhut damb eth conseqüent efècte negatiu envèrs de çò que se preten arténher damb aguesta mesura.

Eth Conselh Generau d’Aran a organizat visites personalizades ath delà d’un centenat d’establiments comerciaus de Vielha entà informar-les detalhadaments des avantatges que pòt significar pera imatge toristica dera Val d’Aran era sua participacion en tot respectar es previsions d’aguest projècte.

Es beneficis dera recuelhuda comerciau deth papèr/ carton consistissen, segons paraules deth conselhèr de Territòri d’Aran, Jose A. Boya, “en melhorar era imatge der entorn que gaudissen es nòsti visitants e optimizar era recuelhuda selectiva deth papèr/ carton”.

Un còp assolidat aguest projècte pilòt en municipi de Vielha, era recuelhuda comerciau pòrta a pòrta deth papèr/ carton s’estenerà ara rèsta de municipis dera Val d’Aran.

Era conselhèra de Torisme e Desvolopament Economic d’Aran, Anna Díaz, a manifestat “entà qu’aguest projècte foncione ei de besonh era collaboracion des establiments comerciaus, collaboracion que de ben segur auram pr’amor qu’eth sector comerciau tostemp s’a mostrat favorable ad aguest tipe de projècte qu’era Administracion lidère”.

Fin finau, eth conselhèr de Territòri d’Aran, Jose A. Boya, a assegurat “des deth Conselh Generau d’Aran trabalham entà melhorar es nòsti resultats de reciclatge en totes es fraccions entà protegir eth nòste miei ambient”.