Eth Conselh Generau d’Aran a installat pendent aguesti darrèri dies dues naues marquesines enes pòbles d’Es Bòrdes e Casau, e a adaptat quate naui punts de parada entà dar servici de transpòrt public en Pont d’Arró e Era Bordeta. Damb aguestes mielhores en transpòrt interior se complissen es objectius que figurauen ena licitacion d’aguest servici que se formalizèc pendent eth 2013.

En paraules deth sindic d’Aran, Carlos Barrera, “damb aguestes mielhores dam compliment ara demana hèta ath Conselh Generau d’Aran pes bailes de Casau, Es Bòrdes e Vilamòs”.

Per un aute costat, dejà s’an installat es 6 prumèrs pannèus informatius digitaus en Les, Bossòst, Vielha, Arties e Salardú, damb er objectiu de qu’er usatgèr age coneishement deth temps de demora deth pròplèu transpòrt. Aguesta ei ua accion que s’enquadre laguens dera melhora de qualitat des servicis.

Era conselhèra de Torisme, Comèrç e Consum, Anna Díaz, tanben a soslinhat que, “pendent es 6 prumèrs mesi der an eth numèro d’usatgèrs deth transpòrt interior s’a incrementat lèu un 10%, en contraposicion deth que succedís en d’auti endrets a on es usatgèrs deth transpòrt public s’an incrementat fòrça leugèraments”.

“Aguestes donades mos confirmen qu’eth trabalh realizat peth Govèrn ena mielhora e racionalizacion deth servici deth transpòrt permet auer ena Val d’Aran un servici cabecièr en transpòrt interior. En aguesti moments manque resòlver eth transpòrt nocturn. Des deth govèrn èm estudiant diuèrses possibilitats damb er objectiu de poder assolidar eth transpòrt nocturn abantes d’aguesta pròplèu sason d’iuèrn” a explicat eth sindic d’Aran, Carlos Barrera.