• Dempús qu’eth COE age manifestat er interès en organizar aguesta candidatura, que compde damb eth vist e platz deth president deth Govèrn Espanhòu, deth president dera Generalitat e eth president d’Aragon, era sindica d’Aran a manifestat eth sòn supòrt ad aguesti jòcs olimpics, que poirien èster ua grana oportunitat entara Val d’Aran

• Eth govèrn d’Aran demore qu’enes pròplèu setmanes pogue disposar d’informacion ath respècte d’aguesta candidatura e atau ac sollicitarà ara Generalitat de Catalunya

Eth president deth Comitat Olimpic Espanhòu, Alejandro Blanco, a enviat ua carta ath president deth Comitat Olimpic Internacionau en tot expressar er interès en organizar en 2030 es Jòcs Olimpics d’Iuèrn Pirenèus-Barcelona. En aguesta missiva s’i an hijut es corresponentes cartes de supòrt deth president der Estat, Pedro Sánchez, eth president dera Generalitat de Catalunya, Pere Aragonès e eth president deth Gobierno de Aragón, Javier Lambán.

Pendent eth plen deth Conselh Generau d’Aran celebrat aguest maitin, era sindica d’Aran, Maria Vergés, a mostrat eth supòrt deth Conselh Generau d’Aran ad aguesta iniciativa en tot manifestar que “deth govèrn d’Aran ençà èm convençudi qu’era celebracion d’aguesti jòcs olimpics en Pirenèu ei ua grana oportunitat e que, de celebrar-se, aurien un impacte fòrça posititiu en nòste territòri” en tot híger que: “eth platnejament d’aguesti jòcs ei amiar-les a tèrme de forma sostenible e respectuosa damb eth territòri, sense crear naues infraestructures senon melhorar es dejà existentes”. Ath delà, Vergés manifestaue que: “un eveniment d’aguest nivèu facilitarie e agilizarie arténher melhores importantes enes nòstes comunicacions, autant a nivèu de mobilitat coma tecnologic”.

En aguest sens, era sindica d’Aran assegure qu’eth Conselh Generau d’Aran encara non a recebut informacion oficiau, mès qu’ei un ahèr que dejà tractèc damb eth President dera Generalitat, Pere Aragonès, pendent era sua visita a Aran en mes de junh, e que demore auer en brèu informacion actualizada.