Pr’amor des interpretacions que s’an realizat per part de quauqui mieis de comunicacion e associacions conservacionistes en base ath comunicat deth Conselh Generau d’Aran de 14/04/2020, ei de besonh esclarir que:

• Eth Conselh Generau d’Aran se ratifique ena literalitat deth sòn comunicat anterior, en quau non se s’avalòre cap causa dera mòrt ne se hè mencion a cap informe de necròpsia, pr’amor qu’encara ei pendent d’arrecéber. En un exercici de transparéncia, e pr’amor qu’era necròpsia complèta trigarà quauques setmanes, s’expliquèren dus hèts destacables que s’auien observat en un analisi preliminar: era preséncia de quauqua herida damb perforacion e eth descens per ua pendent fòrça abrupta abantes de morir.
• Se desestime per complèt cap relacion damb eth condicionament quimic aversiu realizat en octobre de 2019 entà frenar es atacs a shivaus: sonque s’administrèc ua dòsi, e era ingesta d’ua soleta dòsi controlada deth producte subministrat (en base a antecedents scientifics solids e testadi en ossi en cautivitat), se metabolize en pògues ores e non ei bioacumulable.
• Non se realizarà cap auta valoracion d’aguest cas enquia dispausar der informe de necròpsia encargat. Un còp se dispause d’aguest informe, se procedirà a informar oportunament des resultats.