-
Eth govèrn aranés a auut de proclamar era caducitat des expedients que declarauen Bens Culturaus d’Interès Nacionau (BCIN) e protegien un totau de 50 monuments e conjunts istorics deth territòri dempús dera denóncia per part der Ajuntament deth Naut Aran der expedient administratiu d’incoacion d’aguesti bens iniciat ans endarrèr
Eth Conselh Generau d’Aran a auut de declarar era caducitat des expedients d’incoacion de Bens Culturaus d’Interès Nacionau (BCIN) de 8 glèises araneses, 39 conjunts istorics des cascs urbans dera Val d’Aran e 3 monuments istorico-artistics deth nòste terriòri dempús qu’er Ajuntament de Naut Aran, en deseme de 2020, denoncièsse er expedient administratiu de declaracion coma BCIN d’aguesti monuments
Era declaracion coma BCIN d’aguesti 50 elements patrimoniaus en an 1976 non s’arribèc a completar, totun aguesti monuments e conjunts istorics demorauen protegidi e podien acuelher-se a subvencions e ajudes entara sua preservacion.
“Deth govèrn d’Aran ençà dejà trabalham entà restablir era proteccion ad aguesti elements patrimoniaus tant importants entath nòste país”, explicaue era sindica d’Aran, Maria Vergés, en tot híger que: “èm conscients deth valor istoric, patrimoniau, culturau e identitari qu’an aguesti monuments e conjunts istorics, e tanben deth sòn valor toristic, e dauant d’aguesta situacion, de hè fòrça mesi ençà cercam solucions entà dotar-les dera proteccion qu’eth noste auviatge merite a trauès des diuèrses figures urbanistiques actuaus e de d’autes que s’an de crear e enes que ja trabalham”.
Fòrça d’aguesti monuments que dejà non compden damb era declaracion de BCIN, gaudissen dera proteccion d’auer estat declaradi Bens Culturaus d’Interès Locau (BCIL) enes darrèri mesi. Ath delà, eth Conselh Generau d’Aran dejà trabalhe, amassa damb diuèrsi ajuntaments deth territòri, entà dotar aguesti elements de naues fegures de proteccion, mès eficientes e adaptades ara realitat, qu’es incoacions de BCIN realizades en 1976.