• Per miei de ‘Parlem-ne’, eth Conselh Generau organizarà un còp ath mes ua webinar sus diferents tèmes d’interès sociau que compdaràn damb era participacion d’expèrts e/o testimònis

• Era prumèra d’aguestes conferéncies virtuaus aurà lòc eth pròplèu deluns, 19 d’abriu, entàs 19:00 ores, e virarà entorn ar espòrt e era salut

Eth Conselh Generau d’Aran inície aguest mes d’abriu eth cicle de conferéncies virtuaus ‘Parlem-ne’, peth quau cada mes s’organizarà ua webinar dubèrta ath public que compdarà damb persones expèrtes e/o testimònis de diuèrsi airaus, autant sociaus coma especializadi.

“Eth passat mes de març, damb motiu deth Dia Internacionau dera Hemna, organizèrem eth webinar ‘Hemnes en entorns laboraus masculinizadi’, en quau diuèrses hemnes deth territòri compartiren damb es assistents es sues experiéncies en aguest airau”, explicaue era sindica d’Aran, Maria Vergés, en tot híger que “aguest format pòt resultar fòrça util entà tractar damb era ciutadania diuèrsi ahèrs que poguen èster deth sòn interès e, per aguest motiu, auem volut dar contunhitat ath projècte e crear Parlem-ne”.

Aguestes conferéncies tractaran sus ahèrs diuèrsi coma er espòrt e era salut o era prevencion e actuacion deuant der ciber-assetjament, per exemple. Mès tanben se vò qu’es madeishi assistents as webinars siguen qui prepausen es tèmes des que vòlen parlar e, pr’amor d’ açò, se les facilitarà un petit qüestionari en quau plantegen ahèrs deth sòn interès entà tractar enes pròpleu webinars.

Eth prumèr d’aguesti webinars, nomentat “Suenhar-te: Espòrt e Salut”, aurà lòc eth pròplèu deluns, 19 d’abriu, entàs 19:00 ores e compdarà damb era participacion de Eri Sakamoto, fisioterapèuta e professora de ioga, e Foix Trotonda, entrenadora personau e tecnica de Pedales del Mundo.

Es persones interessades poiràn acceder ad aguesta formacion a trauès deth ligam: https://bit.ly/3tz7QDh