Pendent eth collòqui que se celèbre en Benasque se presentarà eth Projècte ENTREPYR II
Vielha, 16 de noveme de 2018.- Es dies 16 e 17 de noveme se celèbre en Benasque eth IIau Collòqui Internacionau de Refugis Pirenencs a on serà presentat eth projècte ENTREPYR II qu’a coma objectiu crear un nau producte toristic que servisque a proporcionar a practicaments era totalitat de refugis des Pirenèus es estruments de promocion internacionau de besonh.
Eth Plan de refugis transfrontalièr deth projècte ENTREPYR II hè part deth Programa de Cooperacion Territoriau Europèa INTERREG V-A (Espanha-França-Andòrra) POCTEFA 2014-2020.
Es darrèri mesi de gèr e mai, eth Conselh Generau d’Aran acuelhec es prumères reünions des grops de trabalh participaires en projècte qu’ara se presente en Benasque.
ENTREPYR II ei un projècte que recuelh entre es sòns objectius arténher qu’es montanhaires poguen recorrer amassa es refugis espanhòus, francesi e andorrans, e era utilizacion des naues tecnologies enes refugis deth Pirenèu. A trauès de ENTREPYR II se crearàn es sinèrgies de besonh entre es sòcis entà elaborar detalhadi itineraris de interconexion entre practicaments un centenat de refugis des Pirenèus. Era informacion se trobarà en ua pagina web que compdarà damb un potent sistèma de resèrva conjunta e que se veirà completada damb era informacion mès de besonh entad usatgèr finau.
Eth plan a ath delà coma un des sòns objectius principaus melhorar era sostenibilitat ambientau e començar dus espacis de trabalh entàs enterpreses e entitats restacades damb es refugis de montanha, ua associacion transfrontalièra e un observatòri pirenenc de refugis de montanha.
Eth Conselh Generau d’Aran participe en aguest projècte europèu amassa damb era Federacion Aragonesa de Montanhisme, era Federacion d’Entitats Excursionistes de Catalonha (FEEC) e eth Govèrn d’Aragon per part espanhòla, amassa damb eth Parc Nacionau des Pyrénées, Era Université de Toulouse III e era Federation Française des Clubs Alpins et de Montagne pera part francesa, e era Federacion Andorrana de Montanhisme coma entitat associada.
Cap arrebrembar qu’a trauès deth projècte ENTREPYR II, damb ua subvencion de 97.500€, eth Conselh Generau d’Aran installarà en dus refugis de montanha dera Val d’Aran dus banhs shuts e dus potabilizadors entath tractament d’aigües residuaus. A part d’aguestes melhores eth Conselh Generau tanben a previst destinar part d’aguesta subvencion ara melhora dera promocion e comercializacion des rotes de senderisme dera Val d’Aran atau coma era difusion dera madeisha via web.
POCTEFA ei un programa europèu de cooperacion transfrontalièra creat entà fomentar eth desvolopament sostenible, atau coma entà refortilhar era integracion economica e sociau deth territòri de Catalonha que limite damb França e Andòrra, a trauès deth finançament de projèctes dessenhadi e gestionadi per organismes publics e privadi d’ambdús costats des Pirenèus. Eth Programa se finance a trauès deth Hons Europèu de Desvolopament Regionau (FEDER).
Foto FEEC
