Er os e eth lop son part deth patrimòni naturau des Pirenèus. Era diversitat d’administracions implicades ena gestion d’aguestes espècies, obligue a realizar grani esfòrci en coordinacion. Aguesta creishenta coordinacion a dat lòc ara execucion deth programa LoupO.

Eth projècte, qu’a coma objectiu principau era creacion d’un plan integrat e estandarizat entara monitorizacion e seguiment des populacions d’os e lop enes Pirenèus, ei dirigit pera Universitat Autonòma de Barcelona, e preten convertir-se un plan de trebalh qu’age continuitat ath long deth temps.

Compde tamb un pressupòst totau de 1.250.109 euros, e ei cofinanciat ath 65% peth Fondo Europeo de Desarrollo Regional (FEDER) a trauèrs deth Programa INTERREG V-A Espanha-França-Andòrra (POCTEFA 2014-2020), un programa europèu de cooperacion territoriau creat entà fomentar eth desvolopament sostenible deth territòri fronterèr o entre es tres païsi. Se desvoloparà pendent es pròplèu dus ans, enquiara primauera de 2022.

Eth Conselh Generau d’Aran, eth Departament d’Agricultura, Ramaderia, Pesca i Alimentació (GENCAT), , Forestal Catalana S.A., eth Laboratoire d’Ecologie Alpine (CNRS) e eth Servei Veterinari de Genètica Molecular (UAB) actuen coma sòcis beneficiaris, e eth Departament de Territori i Sostenibilitat (GENCAT), l’Office Français de la Biodiversité, era Direction Régionale de l’Environnement, de l’Aménagement et du Logement (Occitanie), e eth Ministeri de Medi Ambient, Agricultura i Sostenibilitat (Govern d’Andorra) coma sòcis associats, desvoloparàn, estandarizaràn e unificaràn es metodologies entà hèr eth seguiment sus eth terren e era obtencion de mòstres genetiques der os e eth lop enes Pirenèus, e crearàn ua basa de donades comuna entre païsi. Atau madeish, s’afavorirà era aparicion de mesures de mediacion comunes que trascendiràn es frontères, e se fomentarà era integracion des  grani carnivòrs en un territòri mercat pera activitat umana.

Finalizat eth programa Piroslife en 2019, aguest nau projècte permet ath Conselh Generau d’Aran cofinanciar accions relacionades tamb eth seguiment genetic e demografic des ossi: era contractacion de tecnics de camp e eth materiau associat ad aguest tipe de seguiment. Tanben se participe en estudis parallèls associadi as mòstres biologiques obtengudes coma era analisi dera dièta e deth microbiòma, mejançant tecniques genetiques coma eth metabarcoding e era metagenómica.

POCTEFA 2014-2020                                                                      

Eth projècte LoupO a estat programat ena sua tresau convocatòria peth Comité de Programación deth POCTEFA 2014-2020, que constitusís era cincau generacion de supòrt financèr comunitari destinat a refortilhar era integracion economica e sociau dera zòna fronterèra Espanha-França-Andòrra. Er objetiu de POCTEFA ei refortilhar era integracion economica e sociau d’aguesta zòna. Era sua ajuda se concentre en desvolopament d’activitats economiques, sociaus e mieiambientaus transfronterères a trauèrs d’estratègies conjuntes a favor deth desvolopament territoriau sostenible.

Mès informacion:

Servici de Miei Ambient deth Conselh Generau d’Aran https://www.conselharan.org/departament-dagricultura-ramaderia-e-miei-naturau/

Proyecto Loupo https://loupo-eu.com/