Viella, 23 de hereuèr de 2016.- Era Comission de Halhes, Haros e Brandons s’amassèc eth darrèr dissabte ena Pobla de Segur, ena prumèra jornada de trabalh dempús dera declaracion d’Andòrra deth 3 de deseme der an passat que se celebrèc en eth era declaracion des Hèstes deth Huec des Pirenèus, Patrimòni Culturau Immateriau dera Umanitat pera Unesco.

Marcel·la Andreu

En aguesta prumèra amassada, se decidic que cadun des 63 municipis que celèbren Hèstes deth Huec des Pirenèus elabòren un protocòl festiu, damb er objectiu de fixar ues bases entà assegurar era conservacion des hèstes, atau coma establir uns critèris entàs naui pòbles que se volguen incorporar.
Jèp Montoya, qu’assistic ara amassada en representacion deth Conselh Generau d’Aran, expliquèc qu’aguesti protocòls serviràn en cas dera Val d’Aran, entara conservacion des hèstes e entà qué Les e Arties, poguen explicar com se hèn es hèstes deth Haro, es dates en que se celèbren, quina vestidura amien es que participen o quines son es musicianes e balhs qu’incorpòren.

Era jornada de trabalh tanben servic entà daurir era pòrta ara incorporacion ara declaracion d’Andòrra de pòbles qu’en sòn moment celebrèren hèstes deth huec mès qu’actuauments les an perdudes, per se les vòlen recuperar. Ena Val d’Aran ei eth cas de Betren a on hègen un Haro e a on i a un carrèr dedicat ath madeish, Es Bòrdes, Canejan o Garòs.

Pendent era amassada se decidic encargar un projècte entà crear un dessenh qu’identifique es 63 pòbles e qu’incorpòre simbòls coma era net, eth huec o es colors tradicionaus d’aguestes hèstes.

Calculen qu’eth protocòl hallaire serà hèt en uns dus o tres mesi, quan ei prevista era dusau amassada dera comission.