• As dues antenes dejà plaçades era passada primauera, se’n higen ara 6 mès qu’ampliaràn era cobertura LORA en Aran, en tot perméter hèr front ara manca de cobertura mobil entà poder implementar procèssi de digitalizacion e aufrir un nau servici ath sector ramadèr entà perméter un melhor contròl e gestion des ramats ena montanha

Eth Conselh Generau d’Aran auance damb era implementacion deth sòn projècte de cobertura LORA entà facilitar ath sector ramadèr era gestion des sòns ramats ena montanha, atau coma hèr eth nòste territòri mès competitiu a nivèu digitau, en tot generar un marc d’oportunitats a nivèu tecnologic.

Eth Conselh Generau d’Aran a aquesit naues antenes de cobertura LORA qu’era empresa Arantec a plaçat dejà ena Sèrra d’Arenho (Vilac), en Cap dera Sèrra (Canejan) e en Tuc des Neres (Les). Aguestes naues antenes se higen as dejà plaçades en Còsta Arjàs e eth Guardadèr de Baqueira, damb era collaboracion de Baqueira Beret. Ath delà, ei previst installar-ne tres mès en Tuca (Betren), Uishèra (Vilamòs) e era Artiga de Lin. Es trabalhs de plaçament des naues antenes an compdat damb era collaboracion de Pompièrs-Emergéncies.

“Eth govèrn deth Conselh Generau d’Aran vò amiar a tèrme un procés de digitalizacion e innovacion en tot apostar per aplicar er Internet des Causes en diuèrsi sectors dera Val d’Aran”, afirmaue era sindica d’Aran, Maria Vergés, en tot híger que: “en cas deth sector ramadèr, der ostiu passat ençà, gràcies ara implementacion d’ua pròva pilòt entara monitorizacion dera ramaderia extensiva deth territòri, es antenes de hilat LORA permeten hèr un seguiment deth bestiar per miei de colièrs de geolocalizacion que faciliten tanben informacion sus er estat des animaus”.

Era cobertura LORA ei un tipe de cobertura ràdio (800 MHz) que s’artenh a partir deth plaçament estrategic d’antenes de baish còst e que permet connectar de forma simpla e eficient sensors repartidi per tot eth territòri sense eth besonh de compdar damb cobertura mobil. Aguesti sensors pòden èster consultadi a trauès de quinsevolh tipe de dispositiu (mobil, tablet o ordenador), en tot recéber informacion de çò que passe en un punt remot o connectant procèssi sense eth besonh de cobertura.