Pendent 9 dies s’a liberat ar ossardet en diuèrsi endrets ath torn dera zòna a on siguec trobada peth prumèr còp damb er objectiu de facilitar eth rencontre damb era sua mair. Toti es assagi an estat infructuosi e an agut era madeisha fin; eth retorn der ossardet en qüestion d’ores a lòcs umanizats.

Parallelament, s’a estat trabalhant ena localizacion dera mair mejançant prospeccions e demores ena montanha. Açò tanpòc a dat frut. Per aguest motiu, s’a decidit transportar ar ossardet a un barrat provisionau condicionat laguens d’un bòsc dera Val d’Aran damb condicions d’abitat adequat mès tanben damb dificultat d’accès entà garantir er isolament dera cria des persones.

En aguest barrat se l’alimentarà en tot procurar evitar era sua familiarizacion damb er òme. Aguesta tecnica, coneishuda coma hacking, a coma objectiu qu’er ossardet pogue guanhar corpulència e pes atau coma acostumar-lo progressivaments as hònts de neuritud naturau sense qu’associe era obtencion de minjar damb era preséncia der òme, er objectiu finau d’aguesta tecnica ei poder arribar ath sòn aliberament damb garanties d’adaptacion ath miei.