• Pendent es pròplèus dissabtes deth mes d’agost s’aufrirà un cicle de concèrts gratuïts de musica gospel, classica e jazz en Santuari de Montgarri, era Capèla de Sant Blai e en Plan Batalhèr

Eth Conselh Generau d’Aran, a trauès de Foment Torisme Val d’Aran, a iniciat eth cicle de concèrts gratuits Aran Musicau, peth quau s’organizaràn tres concèrts de musica gospel, classica e jazz en Santuari de Montgarri, ena Capèla de Sant Blai e en Plan Batalhèr es dissabtes 15, 22 e 29 d’agost, respectivament.

“Auem adaptat era nòsta aufèrta culturau tipica d’aguestes dates ara situacion actuau, en tot trasladar aguesti concèrts ar exterior entà poder complir damb es protocòls de seguretat establidi”, afirmaue eth conselhèr d’Economia, Torisme e Promocion economica, Juan Antonio Serrano.

Aguesta iniciatiua, que se desvolòpe damb era collaboracion der Archiprestat dera Val d’Aran e era Deputacion de Lleida, promò era aufèrta culturau en tot méter en valor tres scenaris emblematics deth territòri.

Pendent aguestes actuacions serà obligatòri complir damb es mesures de seguretat marcades pes autoritats competentes coma er usatge de masqueta, sauvar era distància sociau e er emplec des mesures igieniques corresponentes.