• Era Roda Non Stop nèish entà dar cabuda a toti es amants deth mountainbike pur, en un entorn privilegiat e damb ua duresa considerabla.

• Damb 160km e un desnivèu positiu de 5600m, aguesta pròva se place entre ua des mès dures deth Pirenèus e circule integralaments pera Val d’Aran, un scenari perfècte entà poder gaudir dera montanha mès autentica.

Eth Conselh Generau d’Aran a acuelhut era presentacion d’ “ERA RODA NON STOP” a cargue dera conselhèra de Torisme e Desvolopament Economic d’Aran, Anna Díaz, deth vicesindic 2au d’Aran, César Ruiz-Canela, der administrador gerent d’Exciting Pyrenees, Francesc Comas, deth coordinador responsable d’ “Era Roda Non Stop”, Marc Puig, dera responsabla de Copos Bike, Silvia Monge, e deth Club Atletic Val d’Aran, Marc Cuny.

Era Roda NonStop, que se disputarà eth 5 de seteme, aurà un recorregut de 160km e 5600m de desnivèu qu’es participants poderàn desvolopar segons es següents formats:

– Individuau: 100% deth recorregut corbit per un solet corredor
– Equipa de 2: Cada corredor aurà de corbir 80 des 160 km
– Equipa de 4: Cada corredor aurà de corbir 40 des 160 km

Era organizacion abilitarà ua sèria de punts de pas obligatòris, plaçadi enes madeishi pòbles (a excepcion d’un punt de relèu) damb avitalhament pr’amor qu’es corredors poguen hèr pas deth relèu de forma controtlada.

Aguesti punts de relèu se plaçaràn a ua distància aproximada de 40km, en Vielha, Bossòst e Sauth deth Pish.

En aguesti 3 punts de relèu s’auràn de realizar es cambis, tant se participes ena equipa de 2 coma de 4.

Anna Díaz, conselhèra de Torisme e Desvolopament Economic d’Aran, a manifestat “Era Roda a un interès païsatgistic indiscutible e discorre integralaments pera Val d’Aran, es participants poderàn gaudir d’uns paratges impressionanti a trauès d’un recorregut entàs amants deth mountainbike en estat pur”.

En paraules deth vicesindic 2au d’Aran, César Ruiz-Canela, “Era Roda ei ua corsa 100% Val d’Aran damb gessuda e arribada a Salardú e entà tot tipe de nivèu, pr’amor que se pòt hèr individual, per parelhes o en grops de 4”.

Francesc Comas, administrador gerent d’Exciting Pyrenees, a hijut “aguesta corsa ei era union de 3 entitats: Era Roda, Club Atletic Val d’Aran e COPOS BIKE, a mès convidam a d’autes entitats a que se junhen pr’amor qu’Era Roda a d’èster ua corsa entà toti”

Mès informacion e inscripcions: http://erarodanonstop.com