• Per prumèr còp ena istòria deth territòri s’a amiat a tèrme un Plan de Dinamizacion d’aguest sector damb er objectiu de conéisher en detalh es peculiaritats de cada zòna comerciau dera Val d’Aran e aufrir un plan d’accions qu’ajude ath comèrç locau a desvolopar totes es sues possibilitats

Aguest maitin, eth Conselh Generau d’Aran a presentat eth sòn Plan de Dinamizacion Economic-Comerciau dera Val d’Aran, desvolopat pera empresa Intueri, en un acte dubèrt ath public e presidit pes conselhèrs d’Economia, Torisme e Promocion economica, Juan Antonio Serrano e Josep Canut.

“Per prumèr còp ena istòria dera Val d’Aran, eth Conselh Generau d’Aran a amiat a tèrme un Plan de Dinamizacion Economic-Comerciau deth nòste territòri, qu’a coma objectiu estimular eth comèrç e desvolopar ath maxim es sues possibilitats, que son moltes” afirmaue eth vicesindic e conselhèr Juan Antonio Serrano, en tot híger que “pendent un an e miei auem amiat a tèrme un trabalh de recèrca entath quau s’an realizat non sonque enquestes as consumidors e consumidores, senon tanben entrevistes damb es comèrci locaus entà obtier ua radiografia çò de mès detalhada possibe dera situacion actuau”.

Pera sua part, eth conselhèr Josep Canut explicaue que “entà amiar a tèrme aguest Plan, s’an estudiat es tres zònes comerciaus dera Val d’Aran e es sues peculiaritats: Baish Aran damb eth sòn comèrç de termièra, Naut Aran damb un comèrç mès centrat en esquí e era nhèu, e Mijaran coma caplòc comerciau deth territòri” e higie que “aguest plan aufrís prepauses de futur as comèrci deth conjunt deth territòri entà afrontar es rèptes de futur que demoren ath sector”.

Eth comèrç ei un sector economic fòrça important, qu’eth Conselh Generau d’Aran vò desvolopar, en tot èster coneishedor deth gran potenciau qu’a. Per aguest motiu, un còp finalizat eth Plan de Dinamizacion, en vista der interès demostrat per part des empresaris,  s’amiaràn a tèrme talhèrs entà ajudar a desvolopar es accions establides en aguest document, en tot implementar ua pauta de trabalh qu’ajude a impulsar ua part importanta dera economia d’Aran.