• Aguest servici facilitarà era atencion de proximitat as persones en tot aufrir un abordatge preventiu e proactiu en tot prebotjar era autonomia dera persona entà esvitar o retardar era sua entrada en ua residéncia o servici

• Era Val d’Aran ère er unic territòri de Catalunya sense aguest tipe de servici as persones, que contemple era atencion que se preste a ua persona en lòc a on viu, en quinsevolh etapa dera sua vida, damb er objectiu de mantier-se en sòn entorn abituau e arténher atau eth sòn maxim nivèu de vida, benèster e autonomia

Era sindica d’Aran, Maria Vergés, a presentat en ròda de premsa aguest maitin, acompanhada deth director gerent d’Aran Salut, Jordi Vilana, e era directora assistenciau d’Aran Salut, Mª Àngels Borràs, aguest nau Servici d’Atencion en entorn Domiciliari (SAeD) ena Val d’Aran, que se meterà en foncionament a compdar deth pròplèu dia 1 d’abriu.
Eth SaeD prestarà atencion non sonque ara gent grana, senon a totes es persones en quinsevolh etapa dera sua vida qu’agen de besonh aguest tipe de d’atencion en sòn domicili, damb er objectiu de contribuïr ara melhora dera salut e eth benèster d’aguestes persones e deth sòn entorn familhar e sociau e entà evitar espitalizacions e institucionalizacions que non siguen de besonh.
“Aué ei un dia istoric entara Val d’Aran, pr’amor que presentam un projècte que place as persones en centre des accions, qu’assegure ua atencion sociau e sanitària propèra a tota persona qu’ac age de besonh”, explicaue era sindica d’Aran, Maria Vergés, en tot híger que: “aguest servici ère implementat en tota Catalunya mens en Aran e, deth govèrn d’Aran ençà, èm plan orgulhosi de presentar un recors d’atencion transversau adaptat as besonhs e ara realitat deth nòste territòri”.

Aguest Servici d’Atencion en entorn Domiciliari serà un servici universau, e per tant gratuït, e eth procès d’accés ath SAeD s’iniciarà damb era deteccion deth besonh per part deth personau sociau o sanitari d’Aran Salut o ben per demana dirècta dera persona usatgèra, familha o representant legau.

Entara sindica d’Aran “aguest servici mèrque un abans e un dempús ena atencion as persones ena Val d’Aran, perque, ath delà d’èster gratuït ja que consideram qu’ei un servici essenciau tara ciutadania dera madeisha forma que n’ei era assisténcia sanitària, permetarà hèr un gran pas entà consolidar era transversalitat dera gestion sanitària e sociau en Aran”

Era demana d’accès ath Servici passarà per ua comission avaloradora multidisciplinària, formada per professionaus sanitaris e sociaus, que serà era responsabla de decidir, segontes es critèris establidi, s’era sollicitud corresponenta ei aprobada. Peth moment, aguest projècte s’inicie damb 15 persones usatgères detectades a trauès d’Aran Salut, 3 trabalhadores familhars e ua coordinadora deth servici.

Poderan èster beneficiàries deth SAeD totes aqueres persones e unitats de conviuença empadronades en Aran e que requerisquen ua avaloracion dera sua situacion en entorn domiciliari: persones en situacion de dependéncia, persones fragiles o vulnerables que viuen soletes o acompanhades mès damb supòrt limitat, persones damb besonh de supòrt deuant d’ua situacion sociau o sanitària subervenguda, persones isolades o en risc d’isolament, persones damb tractament medic o terapeutic que requerissen seguiment, persones en situacion d’urgéncia e/o emergéncia subervenguda.

Es accions que s’amiaràn a tèrme se classifiquen en dues tipologies de servici: es servicis d’atencion personau, a on era persona usatgèra recep supòrt entà realizar activitats relacionades damb eth suenh personau (igièna, vestir-se e desvestir-se, acompanhament en activitats basiques dera vida diària, gessudes, etc) e servicis d’atencion ath domicili.

Atau madeish es accions a desvolopar se classifiquen en quate encastres: preventives, tà abordar situacions de risc sociau detectades, en tot minimizar-les o eliminar-les e retardar era aparicion de factors associadi ara dependéncia; socioeducatives, en tot desvolopar activitats educatives e d’acompanhament tà incrementar es abilitats de suenh e gestion der entor familhar tà balhar respòsta as besonhs de desvolopament personau e convivenciau; assitenciaus, tà desvolopar accions d’atencion personau e de supòrt tara realizacion des activitats dera vida diària e eth mantenement deth suenh des persones atengudes; e comunitàries, tà desvolopar activitats d’integracion e promocion der envielhement actiu e era dignificacion des persones tà combàter era solitud non volguda e er isolament.

Eth Conselh Generau d’Aran inicie aguest servici en tot dotar-lo d’ua partida de 280.000€/an, e qu’aurà d’èster finançada en part pera Generalitat de Catalunya.

Mès informacion:

Dossier premsa SAED e residencia les

Vielha, 21 de març de 2022