• Aguest Plan a coma principau objectiu convertir Aran en ua destinacion verda e sostenible a trauès de diuèrses actuacions centrades en ahèrs coma era mobilitat, era diversificacion de punts d’interès naturau, era apòsta pes tecnologies e era innovacion e era promocion deth comèrç locau e era agroalimentacion

Aguesta setmana a auut lòc era presentacion oficiau deth Plan de Sostenibilitat Toristica dera Val d’Aran ath sector toristic deth territòri, ua presentaicon qu’enquiara non s’auie podut amiar a tèrme pr’amor dera situacion sanitària.

Cau rebrembar qu’en 2020 era Val d’Aran siguec ua des 25 destinacions escuelhudes per Estat, d’entre es 154 candidatures que se presentèren, entà desvolopar un Plan de Sostenibilitat Toristica, damb er objectiu de modernizar era aufèrta de destinacions toristiques pionères e activar territòris d’interior coma eth nòste.

En aguest sens, eth conselhèr d’Economia, Torisme e Promocion Economica, Juan Antonio Serrano, manifestaue que:  “se mos a dotat de 2’5 milions d’euròs, a desvolopar en tres ans, que mos an de servir entà adaptar eth nòste torisme as besonhs actuaus e, sustot, entà esdevier ua destinacion verda, sostenible e intelligenta, qu’apòste pera preservacion deth nòste entorn naturau, mès tanben pera potenciacion deth nòste auviatge culturau, er espòrt, era gastronomia o eth comèrç locau, entre d’auti”.

Pera sua part, eth conselhèr Josep Canut asseguraue que: “deth Conselh Generau d’Aran ençà volem qu’aguest Plan de Sostenibilitat involucre a toti es agents locaus dera Val d’Aran, d’empreses toristiques e administracions, ara ciutadania, es nòsti visitants  o eth sector dera educacion, entre d’auti”

Es principaus rèptes e objectius d’aguest Plan de Sostenibilitat, en quau se pòrte trabalhant de hè mès d’un an, son: potenciar e refortir eth desvolopament sostenible deth territòri, en tot establir mecanismes de regulacion d’accès ath mèdi naturau e trabalhar en qüestions restacades damb era mobilitat sostenibla, implementar actuacions entà convertir era Val d’Aran en ua destinacion intelligenta, melhorar era relacion publico-privada, meter en valor es recorsi patrimoniaus e identitaris, desestacionalizar e diversificar era aufèrta toristica e generar activitat economica sostenibla aumentant es ingrèssi deth sector toristic damb era finalitat de crear trabalhs mès dignes e equitatius.

Eth plan d’accions ei fonamentat en tres èishi:

1. Governança toristica: aguest èish contemple accions entà melhorar era coordinacion publico-privada e entà convertir era Val d’Aran en ua destinacion intelligenta.
2. Prepauses de valor sostenible, competitivitat e especializacion: accions entà diversificar punts d’interès, crear ua naua aufèrta relacionada damb era bicicleta, regularizar er accès tath mèdi naturau, crear productes toristics accessibles adaptadi e potenciar naui sectors economics.
3. Marqueting e promocion sostenible: en aguest èish se contemplen accions coma eth desvolopament d’un plan de marqueting sostenible, campanhes de promocion micro-segmentades o era creacion de naui supòrts de promocion e comercializacion.