• Pendent eth Plen deth Consorci celebrat ager en Tremp, era sindica d’Aran, en representacion deth Conselh Generau d’Aran, siguec escuelhuda naua presidenta d’aguest òrgan gestor des ajudes Leader ena Alta Ribagorça, que n’ostentarà era vicepresidéncia, Pallars Jussà, Pallars Sobirà e Val d’Aran e a coma finalitat prebotjar accions entà fomentar es sectors productius deth territòri e eth desvolopament rurau

Pendent era tarde d’ager auec lòc en Tremp eth Plen deth Consòrci Leader Pirenèu Occidentau, a on s’escuelhec per unanimitat ara sindica d’Aran, Maria Vergés, coma presidenta d’aguest òrgan en nòm e representacion deth Conselh Generau d’Aran. Era vicepresidéncia requeirà ena Alta Ribagorça.

“Era Val d’Aran jamès auie assomit era presidéncia d’aguest òrgan, qu’a ua grana importància entar impuls de projèctes publics e privadi qu’ajuden a desvolopar, e deth govèrn d’Aran ençà demoram, en aguesta naua etapa, poder trabalhar e melhorar eth supòrt ath sector empresariau des nòsti territòris e impulsar projèctes transversaus que mos ajuden a diversificar era nòsta economia, retier eth talent des nòsti joeni e aufrir ua melhor qualitat de vida ara gent des Pallars, era Alta Ribagorça e Aran”, asseguraue era sindica d’Aran, en tot híger que: “deth govèrn d’Aran èm comprometudi e estenem era man entà trabalhar de manèra conjunta damb es auti territòris deth Pirenèu deuant des rèptes economics e sociaus que trauessam”.

Eth Consòrci Leader Pirenèu Occidentau ei er òrgan gestor des ajuts Leader ena Alta Ribagorça, Pallars Jussà, Pallars Sobirà e Val d’Aran. Es Leader son un metòde de desvolopament locau damb mès de vint ans de trajectòria entà hèr particèps as agents locaus en dessenh e metuda en foncionament d’estratègies, era prenuda de decisions e era assignacion de recorsi a trauès de hons europèus tath desvolopament des zònes ruraus.